CİTO MALKOYTO LEBNON-HUSRONO-HÇOMO İSROYEL

Bıthır mıd u tukoso d’Hizballah b’Lebnon kımohe b’dukotho frişe d’İsroyel, u gayso d’İsroyel’ste kobe funoyo la hçomani. Bu mhoyo d’İsroyel bu taymno d’Lebnon dkıtyo qariwo la thumayda, mawdıc dhdo ma citotho di fnitho hzela husrono.

İ cito d’Mor Gorgis dkıtyo cayıd di cito Malkoyto Qatholiqoyto bi mdito d’Yaroun d’Lebnon, hzela husrono bu mhoyano du gayso d’İsroyel. Elo lfuth i mawdconutho dhiwo, i cito xlithowa bu zabno du hçomo u noşo lo mçarıh ebe.

Mu zabno dımhele u tukoso da Fleştoye d’Hamas, ba dukotho d’İsroyel me 7 bu yarho d’şafıcina uholucdo, kımdawmi’ste hayle d’Hizballah u mhoyathe b’İsroyel. Xıd funoyo la hçomani’ste u gayso d’İsroyel kobe funoyo qaşyo. A taxtuşani’ste kmifaşqi a qaşye dhawın beynothaye mi şato da 2006 uholcudo.