David Vergili maglele du camo Suryoyo cbir li golutho lo mi celtho du momuno ğer mede mgalwele

U mşalo di sfaryawmo d‘Sabro David Vergili maglele du camo Suryoyo cbir li golutho u lo mi celtho du momuno aw ğer mede mgalwele.

Bi maqıblonutho dsimo acme me hdo ma dafe du leşono Turkoyo mahkele cali aykanoyutho du camo Suryıoyo u mırle ucdo kito hedor tlıthmo alfo mu cameydan d’Turcabdin bi golutho u bu athro d’Turkiya qariwo l’cısri alfo hathe kmahuyo qay u camo Suryoyo mgalwele mu athreyde.

Vergili dkıtyo be bzabno hadomo du huyodo Suroyo d’Urifi ESU komıru cboro du camo Suryoyo li golutho hawi şrolutho kyonoyto lu camo Suryoyo.

Bi maqıblonuthathe dsimo camu mşalo di sfaryawmo d’Sabro kmahke bu zabno di mamlaxto cuthmanoyto kmitawmır kıtwo hul 700 alfo mu camo Suryoyo ucdo mati u mınyono l’Cisro alfo hathe belhude mede mdawmroyo.

Vergili dıg mahke cala hayeyde u cali golutho dhiye cayışla kmahke calu Sayfo u komır i golutho du camo Suryoyo kımşaryo meqım mi şato du sayfo inaqa du camo Suryoyo d’Omid u d’Merde kımşarın bi golutho.

U mşalo d’Sabro komır mu gabo du momuno idicoyo di aykanoyutho du camo Suryoyo d’Mıdyad u hedora tawtır ma came hrene dıkhoyın bi dukthathe mawxa ste u momuno latyo i cıltho qmayto du camo Suryoyo kımgalwe, elo bu darğo qamoyo latwa sutor dkımhame u camano u bıthır a siyasat mşahılfe dkımdawmi mu zabno du Sayfo cbırlın u camo Suryoyo la athrawotho di Golutho.

U hadomo d’ESU David Vegili  kmahke du camo Suryoyo cayış u sayfo bi şato da 1915 b’Turkiya ducdo u bi şato da 2015 cayış naqa hreto golutho dkıtwa bu telelo d’Sayfo mi fnitho di daşto d’Ninwe du İraq u be bzabno a Yezidoye cayişi cayni mrore b’Şigur mu taraf da marıhbone d’Dacş. Bu şıklano kul 30 ışne kothe noşe qotır u kmanhıb u cameydan u bıthır  kçobarlan li golutho.

I maqıblonuthathe dkıtyo ğalabe yarıxto kmahke cali casqutho da sobeydan dı cayişi bu zabno di folhutho u be bzabno mahkele cala casqwotho dı hzele u cameydan u mawxa cbırlın li golutho.