18/05/2021

U rişono du gabo da Yaroqe d’Australia mdele i mawdyonutho du qtolğenso da 1915

U rişono du gabo da Yaroqe d’Australia mdele i maqırhonutho du snodo di mawdyonutho bu qtolğenso dsim calu camaydan, calan Armınoye ucala Yawnoye mi mamlaxtho da Cuthmanoye ban 1915.

Adam Brandt dkıtyo hadomo bu parlamento mi mdito d’Melbourne wu rişono du gabo da Yaroqe, snıdle i maqırhonutho dcali mawdyonutho bu Sayfo dsımla i mamlaxtho da Cuthmanoye ban 1915.

Li lohitho di mawdyonutho bu Sayfo dsim ban 1915 cala Mşihoye dıkhoyan’wo bi mamlaxtho da Cuthmanoye, mıştawtafle ucdo u gabo da Yaroqe d’Australia. An ışmone di lohithathe da qoyume u senatore d’Australia’ste, kull dkothe kıyurxo. Adam Brandt hadomo bu parlamento mi mdito d’Melbourne wu rişono du gabo da Yaroqe.

Brandt folitiqoro dıkmşaçıc la zedqe noşoye’yo u ğalabe naqlat tlıble mi şultonutho federaloyto, dmawdıyo bu qtolğenso dsim calu camaydan, calan Armınoye ucala Yawonoye ban 1915 ubu mamlayde mırle; Caybo’yo di şultonuthaydan lo mawdela bu qtolğensano. Calathe kımkararno i qroytaydan la wazire di şultonutho kulle, dmıctarfi bu qtolğenso dsim calan Armınoye, Othuroye u Yawnoye u dmaqwın a ithbate dkito mqabıl du tenkirano d’Turkiya li siyasaydan di baroyutho.

Bu yarho d’Şbot da 2020, mşakalwo İnisyatif mşawtıfo di Kinutho bu parlamento d’Australia leşan u mdoyo d’maqırhonutho dımtaybo’wa mu Komisyon Athronoyo dan Armınoye b’Australia, mu Huyodo Tibeloyo Othuroyo u fırco d’Australia wu Mawtbo da Yawnoye b’Australia, leşan u athro dmawde ba qtolğense da 3 camani. Bu şıkılano holucdo, mawdelın 21 senatore, qoyume u wazire bu Sayfo dan 1915.

25 bu yarho d’Şbot, a tukose da 3 camani mtayabwolın hfitutho marduthoyto l’100 hadome du parlamento, mşale di wazirutho di baroyutho, falohe da makthbe folitiqoye, akademikoye, u falohe du tbocofroso uğer, leşan dmitalım imdat di mawdyonutho bu qtolğenso dsımwola i mamlaxtho da Cuthmanoye calu camaydan, calan Armınoye u Yawnoye bu zabno du qrobo qamoyo dı britho.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…