Demirtaş hkim l’2 ışne hrene hbuşyo

U rişono zawgoyo catiqo du gabo Demoqratoyo da Came Selahattin Demirtaş, hkim tarte eşne hrene hbuşyo calu mamlo dsımwole mqabıl du mqımdino catiqo d’Turkiya Yüksel Kocaman.

Me gabo hreno ftih dacwa mqabıl du rişono di karxutho gawonoyto d’Stanbul Ekrem İmmamoğlu, cal d’thim dımhaqarle u komisyon celoyo da guboye d’Turkiya.

Turkiya kımnasyo bkull darbone, dturyo u rişono zawgoyo catiqo di HDP Selahattin Demirtaş cımre kule bu hbuşyo d’Edirne. Ucdo’ste calu mamlo dsımwole Demirtaş mqabıl du mqımdino Yüksel Kocaman, hkim l’2 eşne u 6 yarhe hbuşyo ubu fusqonano mawdıc; d’Demirtaş sımle u mqımdino nişo li marhıbonutho.

U gabo d’HDP mawdacle, dmatile athmıl u fusqonano du bethdino d’Ankara mqabıl Demirtaş, dkıtyo heş ma 2016 bu hbuşyo. Bu şuroyo du yarhano’ste mçazewo Demirtaş 3.5 hbuşyo ma thome dımhaqarle u rişqutno du athro. Cala thomani di şultonutho, mçaze Demirtaş holucdo l’142 eşne hbuşyo walaw u bethdino da zedqe noşoye d’Urifi, tlıble me Ankara dmarfıyole.

U rişono di karcutho gawonoyto d’Stanbul Ekrem İmamoğlu dkıtyo mu gabo saqıbloyo di CHP, mid nişo l’dacwa hreto mi şultonutho d’Erdoğan. Hanaqla ftiho i dacwathe mqabıl d’İmamoğlu ma thome dımhaqarle hadome di YSK-dkıtyo u komisyon celoyo da guboye d’Turkiya bu mamlo dsımwole bu yarho d’Teşrin u haroyo da 2019.

Mawdıc d’İmamoğlu dheş mu zabno dımnaqe rişono di karxutho-saqıbloyo’yo l’Ankara, mhaqarle 11 hadome di YSK-dlo mawdewolın bi zoxuthayde da guboye da 2019 u tlıbwolın dmisomi a guboyani naqla hreto. Dothe İmamoğlu dmıhkım ba dacwatani, gıdmiçaze 4 u yarho hbuşyo. Lfuth a istatıstike haroye dsimi leşan a guboye da 2023’ste, u camo dıkrohım İmamoğlu, ğalabe zıttır mani dıkruhmi Erdoğane.