Erdoğan ftıhle dacwa mqabıl d’Kılıçdaroğlu

U rişqutno d’Turkiya Recep Tayip Erdoğan, ftıhle dacwa mqabıl du rişono du gabo saqıbloyo d’CHP Kemal Kılıçdaroğlu.

 İ dacwathe ftiho mqabıl du rişono saqıbloyo, cal dıthımle i şultonutho d’Ankara bu qatlo da 13 Turkoye dkıtwın yasire bide du gerilla di PKK b’Nuhadra bu garbyo du Iraq.

A sniğre du rişqutno Turkoyo, ftıhlın athmıl dacwa mqabıl du rişono du gabo Qutnuthoyo da came CHP Kemal Kılıçdaroğlu cal dmawdacle, d’Erdoğan’yo dıktocın mşalutho calu qatlo da 13 farsufe dkıtwın msike bide di PKK b’Nuhadra. Bi dacwathe dftiho, kmıtlıb msombrişo d’500 alfo lirat Turkoye.

A thomani d’Kılıçdaroğlu mqabıl d’Erdoğan, miriwo bu mamlo dsımwole bu parlamento u bıthır’ste bi egartho dfrıswole bi dafayde du Twitter. Hathe latyo inaqla qamayto’ste dıkfotıh Erdoğan dacwat mqabıl d’Kılıçdaroğlu. İ sagiyoyutho da 13 qtilooye b’Nuhadra, folhe Turkoye’wın wa şladathe mqafanwo ba turone d’Gare bu zabno da cuqobe dsımwola Turkiya cali PKK.

Turkiya mdacewola u thımwola u gerilla bu qatlo da 13 farsufani, elo i PKK’ste mawdacwola athmıl, da 13 farsufani; beynothaye u mşalo Kurdoyo dıkhoyarwo calu hbuşyano di PKK qtiliwo bu zabno d’Turkiya sımwola cuqobe calu hbuşyathe. Bıthır mıd hthimiwo a cuqobani’ste, bıdewola Turkiya naqla hreto bu msoko da hadome di HDP.

Hem i HDP u hemste CHP mawdacwolın, bıthır mıd Erdoğan lo qadır dmaxlıs a 13 farsufani, bıdele dıkmnase cali sbutho bu msoko da hadome di HDP. Bi sbutho du qatlo da 13 farsufani, u rişono zawgoyo catiqo d’HDP Selahattin Demirtaş’ste frısle egartho bu Twitter u krıhle u qatlo da farsufani u tlıble rişo basimo la yaqrothathe.