ESU bu buyono dıfrısle krıhle u fusqono d’Turkiya cal Ayasofya

Bıthır ma hfuxye du kenşo Emwothoyo, adyawmaste u Huyodo Suroyo d’Urifi ESU frısle buyono u krıhle u fusqono dmıdla athmıl Turkiya, dımşahlıfo i cito catıqto d’Ayasofya, l’masığdo da maşılmone.

 Bu buyonano ESU mırle; U fusqonano dmid, dawse hreto lu şuşoto di tahrazto folitiqoytoyo leşan dmisomo Turkiya athro Maşılmono u dmitahto i tawditho bu qentrun dkul haqlo da haye.

Bu şuroyo du buyonano dıfrısle u Huyodo Suroyo d’Urifi-ESU lu renyo gawonoyo ula rişone dıbritho mırle; athmıl, bıthır ma qroyotho u ma sturye dımqadım mu kenşo Emwotho ume athrawotho u tukose frişe xıd UNESCO, u Mawtbo du bethdino celoyo d’Turkiya ubu renyo du rişqutno, mid fusqono dmişahlıfo i cito Ortodoksoyto d’Ayasofya dsimowa bethcatiqotho, dmişahlıfo l’masığdo.

ESU mırle; ufusqonano dmıdlın a mşale Turkoye, dawse hreto lu şuşoto di agenda folitiqoyto maşılmonithoyo, leşan dmisomo Turkiya athro maşılmono u dmitahto i tawditho bu qentrun da haye kenşoye kulle. Ayasofya dkıtla şufro di ardixlutho catıqto, dkıtla mardutho di mşihoyutho catıqto u xıd duktho di yortutho catıqto dıbritho, kıtla duktho dilonoyto beyn da mşihoye uda tawdiyotho hrene.

Bu buyonano d’ESU komır; Aysasofya mathlo du makthabzabnoyo, di mardutho u kıtla ithutho xıd duktho mqadaşto. Hani kımo ışne, Turkiya bi rişonutho d’AKP uda bnayqyomayde d’MHP, mahıte klayto qşitho mqabıl da saqıbloye, da gelyunore u kmahrıwi u kımlayti a dukotho da qalilotho du athro.

ESU dkıtyo u qentrunayde b’Bruksel mırleste; Ucdo bı idotho şarye/hire, mhalaqla Turkiya cayni dawsat bu garbyo d’Suriya bu taro du yulfono Maşılmono ba madraşyotho ubi mdabronutho da dukotho dkıtne bu duyoqayda. Bu şuhlofano d’Ayasofya, dawse hretoyo mqabıl da Mşihoye udan athrawotho du macırbo. U kenşo Emwothoyo klozım dmahıt klayto csitho mqabıl da qedomani dkıtne qento la timoyotho di noşutho.