ESU hadır taglitho di awyutho cama Armınoye bu athro d’Swisra

Bu zabno dıkqoşe u qrobo beyn Armenya u l’Azerbaijan, a maqırhonwotho wa hfuxye dhın athrawotho udan Armnoye dıkhoyın bi golutho, kımdawmi.

 Ba yawmothani sim hfitwotho caman Armnoye cami awyutho d’came mşahılfe; beynothaye u cameydan u Othuroyo-Suryoyo.

 Ba hfuxye u ba maqırhonwotho dkobo Armenya, kmahwe mıqa Turkiya mıştawtaftoyo bu qrobano dbeyn Armenya u Azerbaijan, dıkmitamır d’Turkiyayo dhawyo celtho dımşarela imwatyuthathe bu zabnano. Bi maqırhonutho dhule u  rişwazire d’Armenya Nikol Paşınyan mırle; Turkiya kımnasyo dımdawmo u kin  i nefre du qtolğenso dan 1915 u mawxa mşadarla hol 150 rabhaylawotho dıkımdabri u gayso d’Azerbaijan.

Bebzabno a maqırhonwotho da rişone d’athrawotho mşahılfe, kıtulbi şalyuthzayno elo a mşale Turkoyeste kımdawmi ba maqırhonwotho di bcelıdbobutho mqabıl d’Armenya. Me gabo hreno a Armnoye wa came dıksundilın; beynothaye u camo Suryoyo-Othuroyo mıştawtafle la tagılyotho u la hfitwotho dsimi leşan dı gurşi u zuhoro calu qrobo dıkımdawım.

Bıthır ma hfitwotho dsimiwo bu Swed mi claymutho Armnoyto, athmıl mtayabwo taglitho b’Bern d’Swisra. Li hfituthathe dmıştawtflelın a Armnoye u came hrene acmaye u Huyodo Suroyo d’Urifi ESU cam 800 farsufe. Bi hfituthathe dımşarewola bu ışmo; Hirutho u Sutoro l’Armenya, u mathlono da Armnoye b’Swisra Sarkis Şahinyan sımle mamlo u tlıble dmınfıq mqabıl du qrobano u cjiqano dıkmidabır me Turkiya.

Bıthır masır telefon hayo camu gbino du qrobo u ha ma rabhaylawotho mahkele calu aydarbo kımdawım b’qaşyutho. Bi taglithathe sim mamle me 2 qoyume du parlamento d’Swisra wu kohno di cito Armnoyto Guson Alisanyan dıtlıble şlomo u şayno. Ba mamle gawonoye dsimi bi taglithathe griş u zuhoro, dkıtyo Erdoğan bıthre du qrobano dımşarele me hatho beyn dan Armnoye u l’Azerbaijan.