Farsufo mu camaydan dkıtwe htifo mafıt b’teşniqe qaşye

Farsufo mu camaydan dkıtyo mi arişkoyto du Iraq d’Boğdod, htif me tre marıhbone, ub’şıkıl barbroyo mafıt b’teşniqe qaşye.

A hayle di mşaynutho du Iraq dqadiri dımharıri u claymo Ramsis Bıtrıs Albazi, msıklın’ste ha ma hatofayde.

Yawme d’Tre dşaficina ba şoce d’casriye, tre farsufe marıhbone hçımlın calu bayto d’Ramsis Bıtrıs Albazi dkıtyo bi fnitho d’Alzacfaraniya b’Boğdod, ub’şıkıl barbroyo mhıllale u mafıt b’teşniqe qaşye. Atre marıhbone bıthır mıd mhalle Ramsis dkıtyo farsufo mu camaydan, mawbelın li hiğmonutho d’Diyala.

Bıthır mıd şafıc kmo şoce calu htofayde, a hayle di mşaynutho du Iraq qadiri dımharıri u Ramsis dmawbewolın a hatofe bi radaytathe me Boğdod l’Diyala.

Lfuth u buyono dfrısla i mdabronutho da powelıs di hiğmonutho d’Diyala, a hayle di mşaynutho msıklın ha ma hatofe u mqadamlın lu bethdino, elo u marıhbono hreno mahzamwole l’duktho dlatyo idıcto. Ramsis Bıtrıs Albazi dkıtyo u hulmonayde ucdo towo, a powelıs bu buyonathe lo maglelın cali celtho du htofayde.