Fatıryarxo Al Raci mawdacle klozım dmıgrış u zeyno mu gabo d’Hizballah

İ qadişutho du fatıryarxo di cito Suryoyto Qatholiqoyto Mor Bşara Bıtrıs Alraci, sımle qroyto dmitabde guboye gawonoye msarhıbe, u dmişakıl şultonutho dıkmathlo u athro wu camo Lebnonoyo.

 Bebzabno, fatıryarxo Alraci tlıble dmıgrış u zayno mu gabo d’Hizballah dkıtyo u grub ihidoyo dkıtyo msalho b’gawe d’Lebnon.

 Bu mamlo dsımle, u rişono di cito Suryoyto Marunoyto fatıryarxo Mor Bşara Bıtrıs Alraci makadle di fatıryarxutho d’Bkırki lıkobo fsoso dhowe Lebnon warqo da bazare beyn dan athrawotho dkıbci dımcadli a esore dbeynothaye calu hşowo du teşniqo du camo Lebnonoyo.

Fatıryarxo Alraci tlıbleste mi şultonutho folitiqoyto d’Lebnon dfutho u darbo qum da farsufe nahire, athronoye wu şafye, leşan dqudri dmadıcri i ruşmoyutho d’Lebnon wu tuxlono dıbritho eba. Bu tarano, Mor Bşara Alraci sımle qroyto dıklozım baroyo dmişare ba fulhone du şuhlofo, u dmitalız calu tuyobo da guboye gawonoye du parlamento, u dmişakıl şultonutho Lebnonoyto hathto dıkımşablo a yuthrone da Lebnonoye.

U fatıryarxo ba melani mdawamle; u camo kobıc şultonutho du furqono d’Lebnon, lo şultonutho du furqono da rişone folitiqoye dıkhukmi u athro. Ahna camu camo kıbcina şultonutho du athro d’Lebnon, du camo Lebnonoyo, lo şultonutho dıkmathlo a gabe u mathhabe u hayle qlimoye u baroye.

Camgabıdathe, fatıryarxo Alraci bi maqırhonutho dhule athmıl lu tbocofroso makadle dıklozım dmıgrış u zayno du grub Lebnonoyo d’Hizballah, u matcanle i mşalutho di aykanoyutho harıwto du athro u mırle; U qyomo d’Altaef şrele u maqımle miholo a grube mzayne kulle d’Lebnon, elo l’celtho dlıfahminala belhude fayış u zayno bidothe d’grub dışme Hizballah.