Fayıt 13 ışne cali golutho qamayto du camaydan mi mdithod’Mawsal

Fayıt 13 ışne cali şalqa qamayto di golutho du camaydan mi mditho d’Mawsal mu garbiyo du Iraq.

İ şalqathe mşarewola ba swikaste d’farsufe mu camaydan dıkmıqtıliwo b’şıkıl ftiho ub’dukotho camonoye bı Mawsal, cal dkıtwın Mşihoye.

Xıd ucdo bi şabtho qamayto du yarho dı Tışrın u qamoyo bi şato da 2008, mşarewola i tahrazto qamayto du tewfiqo du camaydan mi mdithayde i makthabzabnoyto d’Mawsal, ubu zabnawo u camaydan d’Mawsal kul yawmo kşımacwo d’ha ma n’abnayde sim swikast b’dukotho camonoye u frişe bı Mawsal.

Bu zabnawo dkıtwe Athil Alnujayfi u hiğmuno d’Ninwe, i aykanoyutho di mditho d’Mawsal latwa şlitho, cal dkıtwo qale bayn da Kurdoye u Alnujayfi cali morutho d’Mawsal, mawxa ste a’tre gabe ktıhmiwo hdode bu qatlo du camaydan di mditho, elo du şroro a’tre gabe ham a’Kurdoye u hamıste a’Maşılmone Sunna mıştawtafwolın li tahrazto du tewfiqo du camaydan mı Mawsal, uba swikaste dıkmiqaydiwo xıd fayli majhul awkith u qatolo latyo idico, a’Kurdoye wa Sunna kmıstacımliwo grube marıhbone bu qatlo du camaydan d’Mawsal.

Bi şabtho qamayto dı Tışrın u qadmoyo meqım 13 ışne, a’gunhe du qatlo du camaydan d’Mawsal kmisımiwo ba şoce d’safrayto b’lebo jamudo u qum di cayno da noşe, xıd mathlo ha ma tagore du camaydan d’Mawsal sımwo swikast bu zabno dkıtwe bi dukanayde bi fnitho d’Bab Alsaray ubu zabno dkıtwa i şuqo mlitho camo azolo u athoyo, wa qatole mahzamwolın u hul ucdo hire ne. Mathlo hreno babo mu camaydan wu abrayde bu zabno dıkfılhiwo cam grub d’falohe hrene bu hethotho d’hın bote bı Mawsal, qtiliwo mhın farsufe dlatwın idice bu zabno d’adciwo di tawdithaththe Mşihoyto yo.

Bi netiçe da gunhani du qatlo, menyono celoyo mu camaydan d’Mawsal mahzamwolın l’dukotho hrene mşayantır bu Iraq, u hın menaye ste mgalwewolın larwal du Iraq. Ucıl ma ytawyotho dhawiwolın a’rişone da citotho du camaydan cama mşale di şultonutho, elo naqla hreto lısımwo mede laşan dmitaklın a’swikaste du camaudan d’Mawsal.

A’gunhe du qatlo du camaydan di şato da 2008, kmıhşowi u prov qamoyo du tewfiqo du camaydan d’Mawsal, hul d’athi u tukoso marıhbono dı Dacış dıqşıcwole i şkihutho du camaydan mi mdithathe.