Ftih salon bışmıd du hasyo Bıtrıs Al Nıcme

Bi mditho d’Sadad bi hiğmonutho d’Hımıs b’Suriya, sim u futoho d’salon bışmıd du mnohnafşo tlithoytube hasyo Mor Selwanos Bıtrıs Alnıcme dkıtwe meqım u rişono di marcitho d’Hımıs, d’Hama udı Tartus di cito Suryoyto Ortodoksoyto.

Bıthır mıdkamili a’fulhone du hethothayde, athmıl sim u futoho du salon di cito d’Mor Sarkis bi mditho Suryoyto d’Sadad dkıtyo bi hiğmonutho d’Hımıs d’Suriya.

U salonano mahıt ışme bışmıd du tlithoytube hasyo Mor Selwanos Bıtrıs Alnıcme dımşanewo şawco bu yarho d’Konun u Qadmoyo i şato da 2020 bu cımro d’52 ışne.

U futoho du salon sim bi rişonutho du hasyo di marcitho d’Hımıs, d’Hama udı Tartus di cito Suryoyto Ortodoksoyto Mor Timothawos Matta Alxuri, u mıştawtafleste lu zawho du futoho menyono celoyo d’kohne di marcitho d’Sadad cami gudo du koral da şamoşe u şamışyotho di cito wa boduqe Suryoye d’Sadad uba mowat mu camaydan d’Sadad.

Mnohnafşo hasyo Mor Selwanos Bıtrıs Alnıcme mawladwo bi mditho d’Sadad i şato da na’1968 ma tre abohe Cisa Alnıcme u Sacda Alcabbud, u kıtle tloth ahwotho u ha ahuno. Ubi şato da na’1999 masrahwo hasyo li marcitho d’Hımıs ud’Hama ud’hedoraye di cito Suryoyto.