Ftih u darbo la qıryawotho dı Ninwe lu mazlo mathyo

A darbone dkıtwın hani ışne sxire beyn da mdinotho u qıryawotho di daşto d’Ninwe, adyawma ftihi lu mazlo u mathyo.

Me gabo hreno, bi rmoyto dımqadmo lu parlamento du Iraq, tlib dmitıctarıf bu qtolğenso dsim cala Ezidoye bi şato da 2014.

İ wazırto di galwoyutho bi şultonutho du Iraq İvan Faeq Jabro dkıtyo mu camaydan di cito Kaldoyto d’Bobel, bi socurutho dsımwola ba yawmotho dşaficina lu garbiyo du Iraq, hawiwola ytawto camu waziro di gawoyutho di şultonutho d’Arbil Ribar Ahmad.

Bi ytawtathe, Jabro tlıbwola mu waziro di gawoyutho dmıftohi a darbone dhani eşne sxirene bi daşto d’Ninwe. Calathe, i şultonutho du qlimo d’Kurdistan adyawma hula funoyo lu talab di wazirto u bı surhobo ftıhla a darbone dıkmasri i mditho d’Telkepe u Alqoş u dıkşufci me Batnaya u me Baquba hol u madınho di qastra d’Telesqof.

Bıthır mıd şafici 27 yarhe calu kboşo da mdinotho u qıryawotho makthabzabnoye du camaydan mu tukoso marhıbono d’Dacış, a hayle Iraqoye u bi methcadronutho di Peşmarga u da hayle du camaydan di daşto d’Ninwe d’NPF, qadiriwo dımharıri i daşto d’Ninwe. Elo bıthır mıd tayım u kriz d’Dacış, nafıq kriz hreno dkıtyo masro cami qale dıkmdawmo beyn d’Boğdod u du qlimo d’Kurdistan cali morutho di daşto d’Ninwe wa fenyotho hrene dheş latne safye bu garbiyo du Iraq.

Bi netije di qalathe, fliğo i daşto lıtre falqe, beynothaye falqo dıkmidabır ma hayle d’Alhaşd Alşacbi acmayeste u grub d’Babilyon, u falqo hreno dıkmidabır ma hayle di Peşmarga. Mawxaste a darbone dıkmasri a mdinotho u qıryawotho du camaydan di daşto sxiriwo mi şato da 2016 bi netije di qale dıkmdawmo beyn da Kurdoye u da Şica d’Alhaşd Alşacbi.

Me gabo hreno i qoyumto Ezidoyto bu parlamento du Iraq Xalida Xalil, bi rmoyto dımqadamla tlıbla dmitıctarıf da gunhe dsımle Dacış cala Ezidoye d’Şigur, xıd qtolğenso. İ rmoytathe bıthır mıd maqıblo mu rişono du parlamento Muhammad Alhalbusi, mşadro ucdo li sictho qonunoyto du parlamento.