Ğalabe rişone d’athrawotho mahwelın hfuxyo mqabıl du ferqoco dhawi b’Beyrut

Me gabo hreno a 2 furqoce dhawın athmıl b’lokal du lmino d’Beyrut dıkmitıftakır kıtwolın haylo d’600 tonat d’TNT, bı qaşyutho krihi me mşale u rişone dı athrawotho frişe dıbritho; beynothaye u rişono d’Amerika, u rişqutno d’Fransa, u rişwazire d’Britania u rişone danathrawotho Caraboye uğer.

 Cali aykanoyuthatheste, a mşale Lebnonoye qrelın adyawma yawmo d’haşo u huwlın şudoyo, dıgmımsoki a hayobe dımtayablın a 2 furqocani.

 A 2.750 tonat du mluwano du ammonium-nitrat hani zabno d’6 eşne, bı lokal du lmino d’Beyrut’wın u hayle di mşaynutho d’Lebnon, kmıftakri dıha ma falohe du lminano, hawi celtho la furqocani. Cali aykanoyuthatheste, u rişqutno Michel Aoun qrele lu Mawtbo di mşaynutho d’Lebnon dsoyım knuşyo msarhıbo.

Elo a 2 furqocani, xlıqlınste hfuxye beyn da mşale uda rişone dıbritho wu rişono Amerikoyo Donald Trump mawdacle dmatile xabro mu gayso Amerikoyo u baroyo mahıtle sawco dkıtyo hano furqoco. Trump makadle u mırle; Lebnon mın mcadronutho dlozamla, hadirena d’sundinala.

Rişone d’athrawotho frişe du Madınho Mescoyo; beynothaye du Iraq u dı İran, i Scudiye wan athrawotho du Xaliç krıhlın u hjomano u i İsroyel mawdacla dkıtyo hadırto dımşadro mcadronutho noşoyto l’Lebnon. Holucdoste heş latyo idico i celtho da furqocani u noşo lo mıdle i mşaluthathe, elo idicoyo du tukoso Şica d’Hizballah kıtle cambar da zayne b’Beyrut.

Bebzabno Britania, Fransa, Almanya, İtalya, Qufrus, Malaysia mawdaclın dgıfulhi cam Lebnon leşan u snodo du athro bkul haqlo. A mşale mawdaclın, dhawın şok mu mede dhawi b’Beyrut u me qariwo kımtahqıbi u gunhano dhawi.

Camgabedaniste, u fatıryarxo di cito Suryoyto Marunoyto Mor Bışara al Raci mawdacle u haşayde calu husrono dıtrelın a furqocani wi Mdabronutho yothoyto du garbyo udu madınho d’Suriya mawdacla u snodayda li şultonutho d’Beyrut.