Gantz tlıble dmitarfın ahbişoye hire

İsroyel mawdacla, leşan dhowın sanode bu hethotho du Xtuto d’Ğazza, klozım bi qamayto dmitarfın a folhe İsarloye dkıtne hbişe.

Bebzabno mawdıc, da hayle İsarloye msıklın 50 Fleştoye bu Macırbo d’Dıffa. Cali m’watyuthathe’ste, sim tagliyotho b’athrawotho frişe dbritho leşan u snodo da Fleştoye.

U waziro du sutoro d’İsroyel Benny Gantz mahıtle şart qum da Fleştoye leşan u snodo du bnoyo du Xtuto d’Ğazza. Gantz mawdacale, leşan İsroyel dımcadro bu hethotho da dukotho da Fleştoye, klozım bi qamayto dmitarfın a folhe wa mdinoye İsarloye dkıtne yasire bıgawe da thume da Fleştoye.

U tukoso d’Hamas mawdacwole ba 2016, dımsıkle 4 folhe İsarloye yasire uğer folho hreno mvayco’yo heş ma 2014 b’Ğazza. Benny Gantz mırle; İsroyel gıdmşahlıfo i siyasayde mqabıl d’Ğazza, en dmitakle u mhoyo da soruhe lıgawe da thumaydan. Elo mşale folhoye u folitiqoye d’Hamas, gıdfayşi bi lohithaydan da swikaste.

Bıthır mi şalyuthzayno dsimo ba yawmotho dşafıcina bi mescoyutho d’Mısır-bıthır 11 yawme d’taxtuşe beyn d’İsroyel u d’Hamas, mawdıc da hayle İsarloye sımlın athmıl cuqobe b’Dıffa i Macırboyto u msıklın 50 Fleştoye. Bu zabno da tagliyotho uda taxtuşe dhawın, msıkwolın a İsarloye hol 1800 Fleştoye dhawilın ido ba hçome dsimi cala İsarloye.

Elo camathe’ste a Maşılmone dqawın b’Urifi, mahwelın u snodathe la Fleştoye u mtayablın tagliyotho b’athrawotho frişe d’britho; beynothaye b’London d’Britania. Li taglithathe mıştawtafle 180 alfo dıbnaynoşo-dıkmifaşqo i taglitho rabtho dsimo holucdo bu makthabzabno d’Britania u mahwelın hfuxyo mqabıl d’İsroyel.