Gıdmisım u futoho di cito d’Mor Tuma b’Mawsal

Tlotho bu yarho dı Tamız dıbqamuthayna, gıdmisım u futoho di cito d’Mor Tuma da Suryoye Qatholiqoye bi mditho d’Mawsal bu Iraq.

Hathe i cito qamaytoyo dgıdmisım u futohayda bi xasra yaminoyto d’Mawsal, bıthır mıdkamili a’fulhone du hethothayda.

U kohno di cito d’Mor Tuma da Suryoye Qatholiqoye di mditho d’Mawsal qaşişo Byos Caffas, bi maqırhonutho dhule lu tboco froso du camaydan mawdacle du futoho di citayde dıknıflo bu yamino d’Mawsal, gıdhowe bu yawmo du duxrono du qadişo Mor Tuma dıknofıl 3 bu yarho dı Tamız dıbqamuthayna.

Qaşişo Byos mırle ste “i cito d’Mor Tuma cıl mıdhariwowa sımwo eba qurobe alohoye ğalabe u fulhone du hethotho, ubu şıklano hawyo i cito qamayto dkulle di xasra yaminoyto d’Mawsal dsim u hethothayda udımtayıb eba qerowe alohoye. U futoho ruşmoyo di cito d’Mor Tuma gıdmisım bu qurobo alohoyo dgımrayşanle u hasyo di marcitho d’Mawsal Mor Yuhanna Bıtrıs Muşe 3 bu yarho dı Tamız bi şuctho da 10 dsafrayto. Ubıthır mi slutho du qerowo, gıdmisım zawho du tewdico dı kthowo hatho dkımmathıl sefro makthabzabnoyo di cito d’Mor Tuma. Bu kthowano kito surotho yaqire dkımgaşmi maşıqle mşahılfe mu cımro di citathe dıkdocır l’150 ışne hulu tehriwayda ma grube marıhbone dı Dacış”.

Qaşişo Byos Caffas mawdacle ste laşan dhowe aftho la nabne du camaydan dmıştawtıfi lu futho di cito d’Mor Tuma bı Mawsal, gıdmibayın base ba mdinotho d’Caynkawa ud’Nuhadra laşan dnıqli u camo li mditho d’Mawsal.