Gudo dı dayroye me Romanya sımme socurutho la dayre d’Turcabdin

Gudo da dayroyo dathın mu athro d’Romanya sımlın socurwotho la dayre maktbazabnoye du cameydan dkıtne b’Turcabdin u laqın ba tıre hsayo mcalayo d’Turcabdin u di marcitho d’Merde Omid  u hedora.

 A dayroyani ba socurwothani abici me qariwo dhozın a dukotho mqadşe du cameydan u mıdlın mawdconutho cala dukotho maktbazabnoye du cameydan.

İ gudo da dayroye me Romania bi qamayto sımlın socurutho li dayro d’Mor Gabriel u mıstaqbıli mi mcalyutho d’Mor Timathewos Şmuel Aktaş dkıtyo u hasyo di marcitho d’Turabdin u rişdayro d’Mor Gabriel.

Bıthır mıd mıstaqbli mi mcalyutheyde, makırxi ba bınyone makthabzabnoye di dayro u mahke aclaye wa dayroyeste mşayelın calu şufro da bınyonani dımacımri me zabno yarixo bu şıkıl dtore a hazoye mdamre. Bi socuruthathe i gudo da dayroye dathınwo me Romanya mıdlın mawdconutho cala haye di dayro u du camo Suryoyo dıkhoye b’Turabdin.

Bıthır mi socurutho l’Mor Gabriel, a dayroye sımlın socurutho li dayro d’Kurkmo du Zacfaran u mıstaqbli mi mcalyutho d’Mor Filiksinos Saliba Özmen u makırxi u mahwın a bınyone mdawmre di dayrathe’ste dkıtyo macmarto cala bınyone makthabzabnoye du cameydan. İ gudo da dayroyani, mahwelın i fsihuthathe cali socuruthathe dsımlın la dukothani a makthabzabno du camaydan, dıkmıhşowi a dukotho qamoye di Mşihoyutho.