Hawi taxtuşe ba tagliyotho dhawın bu athro d’Lebnon

U rişqutno d’Lebnon Michel Cawn, sımle qroyto lu huyodo Athronoyo bıthır mu cnufyo qaşyo dhawi ba tagliyotho dsimi bi arişkoyto Beyrut.

 Ba tagliyotho dsimi bı dukotho frişe d’Beyrut, nafıq taxtuşe beyn da mtagliyone dıksundi gabe saqıbloye frişe.

Bıthır mu qrobo gawoyo d’Lebnon, heş lo rakiwo i şawyutho u balans beyn da came tawdithoye frişe du athro. Hani yarheste, kımdawmi a tagliyotho bu athro mqabıl di aykanoyutho lo tawto du momuno u mqabıl di şultonutho dlıkımsafyo u kriz folitiqoyo du athro dkıtle adyawma hol 35 ba mo batilutho da şuğlone.

Athmılste, nafıq naqla hreto taxtuşe beyn dı dukotho frişe di arişkoyto Beyrut, beyn da mtagliyone dıksundi gabe saqıbloye frişe ubı dukothoste şmic qole du zayno. A taxtuşe hawın beyn da sanode uda saqıbloye du İran udı Hizballah. Cala taxtuşaniste, u rişqutno Michel Cawn sımle qroyto l’huyodo Athronoyo.

Cawn mırle; U haylaydan kull naqla u huyodo Athronoyoyo. U mede dhawi athmıl casriye, zago du qentowe u calathe klozım kulayna, dmahtina i saqıbloyutho folitiqoyto dkıtlan lı xasra u dfulhina camhıdode leşan dmawfqina u athraydan ma krizani dkımdawmi.

Ba taxtuşani dhawın bu wahdo da Sohde b’Beyrut, jbiri a hayle di mşaynutho dımdaxli u mıstacmelın ğaz da damce cala mtagliyone u msıklın 14 farsufe. Bu zabno da taxtuşani, mjarıh 48 farsufe. Mtagliyono Mşihoyo mırle; Nafıqina la zabuqone, leşan dtulbina a zedqaydan, zedqo du hulmono, du yulfono, da şuğlone uğer zedqe asasi di noşutho leşan dı qudrina dfayşina ba haye.