Hawi taxtuşe beyn da hayle İsraloye u du tukoso d’Hizballa

U rişwazire d’İsroyel Bınyamen Netenyahu, mawdacle da haylawothayde nafiqi mqabıl dıhjomo dıgsamwole grub m’Hizballa dşafıcwo m’Lebnon la narcotho d’İsroyel.

Megabo hreno, Hizballa dıkmısnıd mu İran bu buyono dıfrısle mankarle dhawi taxtuşe bayn da folhayde wu gayso d’İsroyel.

U rişwazire d’İsroyel Benyamen Netenyahu, bu mamlo dsımle bu qentrun di wazirutho du sutoro bi mditho dı Tel Aviv mırle “Hizballa klozım dodıc dıkmıştace bi nuro”, u mzaharle d’İsroyel gdobo funoyo qaşyo layna hjome dkibe dhowın mi xasra d’Lebnon.

Lfuth amabuce dkıtle Reuters b’Lebnon, ba casrowat d’foqucwotho mhalqile u gayso İsarloyo cali fnitho da mazracyotho d’Şıbca dıknıflo cala thume bayn İsroyel u Lebnon u dkıtyo ma fenyotho dlatne safye awkith dkito heş qale aclaye. Ubi netije da foqucwothani dımhalqi, hawi yuqdone ba mazracyotho d’Şıbca u mbarbız u dexono di nuro bi fnitho. Elo lo İsroyel u loste Hizballa mawdaclın dımjarıh noşo awste dhawi husrono.

Netenyahu bu mamlayde mawdacle d’grub m’Hizballa şafıc la narcotho d’İsroyel, u mşadarle zuhoro lu notarrozo gawonoyo du gabo Hasan Nasralla u mırle “Lebnon hule timo rabo la hjome dsımwole Hizballa cal İsroyel bu dacbar, u kımqadamnole nasihutho dlımkarır u fawdano naqla hreto”.

Camgabıdathe, malolo bışmıd du gayso İsarloyo bi maqırhonutho dhule, mawdacle bayn dıtlotho u hol hamşo farsufe ma mzayne d’Hizballa mıştawtaflın lu cuqobo dsim, u bıthır daciri l’Lebnon. Elo u gabo d’Hizballa bu buyono dıfrısle mankarle da haylawothayde mnaselın dşıfci la narcotho d’İsroyel awste dhawi taxtuşe bi fnitho da mazracyotho d’Şıbca.

Mxasra hreto, u rişwazire d’Lebnon Hassan Diyab bi maqırhonutho dhule adyawma, mawdacle d’İsroyel dışla i morutho d’Lebnon bu hjomo folhoyo dsımla athmıl cala thumayde, u sımle qroyto dmiqadım b’zuhoro bu taro di mwatyuthathe.

Ucdoste, İsroyel frısla ahaylawothayda cala thume du garbiyo du athro, xıd ihtiraz mu hfuxyo dkibe dmahwele Hizballa calu qatlo dıha ma hadomayde bu hjomo dsımwola İsroyel meqım şabtho, cali erişkoyto dı Darmsuq.