Hawi taxtuşe hathe beyn d’Armenia u Azerbaijan

Naqla hreto a taxtuşe beyn Armenya u Azerbaijan mşarelın me hatho.

 Bıthır mıd mşarelın a taxtuşaniste, Turkiya mıhdo mahwela hfuxyo u mawdacla dkıtyo hadırto lu qrobo mqabıl d’Armenya u dı sundo Azerbaijan.

 U qrobano dlatyo mede hatho beyn da 2 athrawothani, dkul ha menaye kmaqrıh di morutho d’Nagorno Karabakh dideyo. U qlimano dıkfoyış beyn da thume d’Azerbaijan elo i mdabronuthayda me Armenia kmisomo u bu zyudo du camo dıkhoye ebeste Armınoyoyo.

Ba 90’yat dımşarewole u qrobano beyn da 2 athrawothani qtil mınyono celoyo dıbnaynoşo ma 2 gabe. Ucdo bu tahrik dsim me Turkiya naqla hreto mşarelın a taxtuşe beyn da 2 athrawothani dıktuhmi hdode bu qatlo u tehriwo da mzayne dıhdode.

Ba taxtuşani, Turkiya mşarela dfırso maqırhonwotho lu snodo d’Azerbaijan bkul mede dkubci. Bu zabno d’Turkiya da maqırhonwothani du tahrik, Rusya grışla u zuhorathe tlıbla dmitarkıw şalyuthzayno udlo gdımdawım u qrobo.

Bu zabno dıkmdawmi a taxtuşe atre athrawotho dıktuhmi hdode dkımmi; U athro hrenoyo mşarele a taxtuşani u bebzabno kobın mawdconwotho du moral la folhathe dıkmahwın u haylathe qweytır me du hrenoyo.

Me gabo Armenya kmawdıco dshıfla zayne yaqure d’Azerbaijan u me gabo hreno Azerbaijan ktohım Armenya bu mhoyo dıba mdinoye. Cala taxtuşani dkımdawmi, hın athrawothoste huwlın maqırhonutho dı zuhoro lu husrono dkowe cala mdinoye da 2 athrawotho.