HBA bu buyono dıfrısle krıhle ahjome d’Turkiya calu cameydan du Iraq

U gabo du Huyodo d’Bethnahrin Athronoyo HBA, frısle buyono dıkrıhle ebe b’qaşyutho uhjomo di şultonutho d’Erdoğan cala arcotho du Iraq, dhawın celtho dmıjbır u cameydan dmaxle zıttır me 30 qıryawotho.

 Bu buyono d’HBA dıkmitahke cala qatle wa hjome dhawın calu cameydan mu zabno du Sayfo hulucdo, kıtlın ha nişo dı quşci u camo Kaldoyo-Suryoyo-Othuroyo ma dukotheyde a şerşoye.

U  buyonano d’HBA dımşadır l’Emwotho Mhaydotho uli şultonutho Iraqoyto ulu ray dıbritho kımşare ba melani: Lo zaycitu ma hjome dkowın camo Iraqoyo wu camo Kaldoyo-Suryoyo-Othuroyo. HBA bu buyoneyde dıkmahke calu floğo d’Bethnahrin lfuth Sykes Picot, u calu Sayfo dhawi calu cameydan bi şato da 1915 mi mamlaxto Cuthmanoyto dkıtyo Turkiya dadyawma, ucdo Erdoğan ksoyım hjome hrene calu cameydan larwal ma thumayde cal ışme dıksoyım hjomo calu gerilla di PKK.

HBA komır; U nişo di marhıbonuthathe dıksoyım, dmawfıq u camo ma dukothayde bu kboşaydeyo. U hathe krumzo msawyo da hjome dsımwole Dacış ba 2014 cali daşto d’Ninwe wa hjomani ducdo cayni zıhniye kıtlın. Bu buyono ksoyım HBA sturyo i şultonutho d’Boğdod, wi şultonutho du qlimo d’Kurdistan dlıknufqo moro u dlıkmahti klayto mqabıl du mede dkowe calu camaydan.

HBA bu buyonathe mırle; Ksaymina qrayto li şultonutho du athro, dımqadmo u hfuxyayda l’Emwotho Mhaydotho, leşan dobo hşowo ma hayobe dıksaymi a hawbani mqabıl du cameydan uda came hrene du Iraq. U buyono komır; Kıkurhina bı qaşyutho u kboşo da hayle Turkoye calan arcotho du Iraq, u be bzabno kımmina klozım dnufqo mu athro. Me darbe d’Turkiya dkıbşo an arcotho d’ğer athrawotho, klozım dımsafyo a qetre wa şuwole gawoye dkıtla.