HNB sımla hfitutho laşan da neşe d’Suriya wu du Iraq

U huyodo da neşe d’Bethnahrin d’Giesin d’Almanya sımlın hfitutho mşawtafto cami cito ewangeloyto di mditho laşan d’gurşi u zuhoro cala gunhe u rdufye dkowın cala neşe bu zabno du qrobano dkımdawım bu athro.

 İ hfituthathe dımşarela athmıl ba mamle u teqitho da şamce gımdawmo hul 7 şabe dıgdowe hfitwotho mşahılfe.

 Cito almanoyto d’Giesin d’Almanya kul şato bu zabnano ksaymo hfitwotho laşan gurşo u zuhoro cal sbutho  u cnufyo dkowe bıbritho , adşato mıdlın I sbutho da rdufye dkowın cala neşe du camo Suryoyo u Yezidoyo dıg fayti me maşıqlo casqo du qrobo bi gozarto d’Bethnahrin u daşto d’ninwe.

I hfituthathe mabıdyolın athmıl bi cito ewengeloyto d’Giesin bi mşawtfutho du huyodo da neşe d’Bethnahrin u da mathlone da Yezidoye bha turgomo dımhadarwo. Bu turgomano i mathlonitho d’HNB Nursen Michel wi mathlonitho da yezidoye  Suriye Ardan sımlın mamle dı mahkelın i casqutho dıgfayti mena a neşe da came dıkhoyın bu daşto d’Ninwe u bi Gozarto d’Bethnahrin

I hadımto d’HNB Turkan Ucar sımla mamlo cami trawma mınyo wu tahthir dkıtla cala came dıkmitafiti mi trawma du qtolcamo u da qrobe. Bıthır mu mamlo dsımla Annmari i Teodora u Teodoroz mqadamlın 3 zmaryotho dkıtwene calu Sayfo, calu cameydan u qolo citonoyo.

Bi hfituthathe da neşe kule l’wışwolın l’buşe kome i mathlonitho d’HNB maqıthla u şamco qamoyo u bıthır a hadire kule maqıthlın şamce laşan dhowın nuhro b’qamuthe da came.

Bıthır mucdo 7 şabe a neşe gıdluwşi l’buşe kome u gımşadri qulnaqa 7 egrotho bu meil l’7 farsufe laşan dı gurşi u zuhoro cali hfitutho dıkmisomo laşan dmitakle u cnufyo, wa cburye ğensoye dkowın cala neşe ba dukotho du qrobo.

A zuze dı latimi bu yawmano gıdmişadri la neşe du camo Suryoyo u lu camo Yezidoyo.