HNB Urifi hadır b’Konferans da neşe b’Almanya

ALMANYA – Ba yawmotho dşafıcina, mtayablın a şutose u tukose da neşe Kurdoye u acmaye qaşışto di cito Evangeloyto, konferans bi cito dı Mşiho dkıtyo mdito d’Hannover d’Almanya, bi mıştawtıfonutho di wazırto catıqto di kinutho du athro Heidi Merk. İ sbutho rişonoyto du konferansano, dmıgrış u zuhoro cali aykanoyutho da came frişe dıkhoyın b’Suriya’wa.  

U calathe maczımo i mşalonitho d’HNB d’Urifi Tibelya Ahron lu konferansano, leşan dmahkıyo cali aykanoyutho gawonoyto du camaydan b’Suriya. A mtaybone du konferansano, tlıbbe mawdconutho rwıhto me Ahron, cala casqotho dıkloqe u camaydan, aydarbo kcoyış ba dukothayde, u ağuno wu nişayde bu qlimo mınyo. Camathe’ste mahkela cala tathire dıtrelın a zulzole calu camaydan wi mcadronutho dımqadmo ma şutose du camaydan la sniqoye.  

Bu mamlayda Ahron sımla sturyo a mtaybone du konferans u mahkela, dlo belhude kito Kurdoye bu qlimano elo dıkhoye came frişe ebe, xıd Suryoye-Othuroye, Ezidoye, Armınoye, Araboye uğer. Ahron m’akadlaste, du camaydan, u camo şerşoyo du qlimoyo u huwle catirutho rabtho li yortutho dbritho wadyawmaste ha ma came rişoye dıkmoyıd duktho cama came hrene bi Mdabronutho Yothoyto dımşatso uba fulhone ubu ağuno mşawtıfo dkobın bu qlimoyo.  

Bıthır mu mamlo d’Ahron, a mıştawtıfone du konferansano mahwelın calaqa rabtho u mşayelın a şwolathe li mşalonitho d’HNB u m’akade cali sniqutho dımdawmi a esore wa fulhone dbeynothaye bu dactithste. Me gabo hreno, i sictho d’HNB b’Hamburg mawdacla dgımaqimi baso mi cito d’Mor Dimet, leşan dhudri bi taklitho dgımisomo 11 bu yarhano b’Giessen.   

U baso dsim sponsor me Aziz Aygun cali ruho di emayde, gıdqoyım bi şoctho da 07.30 d’safrayto me Hamburg, leşan dmalhıq lu meetingano dgımşare ba 15.30 b’Giessen. Calu darbo’ste gıdfoyıt u baso cal Delmanhorst u Marburg, leşan dmoyıd a farsufe dkubci dhudri i hfituthathe d’8 Odor b’Giessen.