HPG qtila 494 folhe turkoye ba 3 yarhe haroyani

A hayle Kurdoye di HPG mawdaclın u kunoşo da cuqobe dsımlın a hayle kaboşe d’Turkiya bu garbyo du Cıraq. Bi mawdconuthathe magle, di HPG qtila b’zabno d’3 yarhe 494 folhe Turkoye.

Me gabo hreno mawdıc’ste, dnafıq taxtuşe beyn du gerilla di PKK uda hayle di peşmerge di KDP bi hiğmonutho d’Nuhadra.

A Haylawotho du Sutoro da Came-HPG frıslın maqırhonutho lu renyo gawonoyo calu husrono d’trela cala folhe Turkoye dkıtne bu garbyo du Cıraq. Lfuth i HPG, ba taxtuşe dhawın qtila bu zabno d’3 yarhe haroyani 494 folhe Turkoye. Camani’ste, ba hfitwotho du sabotage, mahrawla i HPG mınyono celoyo d’radoyotho folhoye.

Bebzabno mawdıc, d’nafıq taxtuşe qaşye beyn du gerilla di PKK uda hayle di peşmerge du qlimo d’Kurdistan. Elo a 2 hayle’ste thımlın hıdode ba hçomani dhawın athmıl cala nuqazyotho dhıdode bi hiğmonutho d’Nuhadra. Ba taxtuşani’ste noşo lo qtil ulo mçarıh.

İ peşmerge mdacela, di PKK mhela ba haylawothathe qariwo lu turo d’Metina wi PKK’ste thımla i peşmerge di KDP, bu isticmal d’zayne yaqure, bu tewqido da turone ubu dyoşo dcala dukotho dkıtne bi moruthayda. Elo u mede dıkgorış u zuhoro’ste, meqım dnufqi a taxtuşani, fayiri a tayosyotho wa helikoptere da hayle kaboşe d’Turkiya cali fnitho

Turkiya kımnasyo bkull darbone dquşco i PKK bu athro ubu garbyo du Cıraq u kull zabno kımabdıyo cuqobe cala dukotho di PKK. Camathe’ste ba esore dkıtla Ankara cami KDP, xlıqla m’watyutho beyn da 2 gabe Kurdoye. Bu şuroyo du yarho d’şafıcina’ste qtıwo 5 folhe di peşmerge bu turoano d’Metin wi KDP thımwola i PKK bu qatlathe.