İ cito d’Mor Batlo di qritho d’Arbo d’Turabdin cama bethqburayda, hiwo l’Toki

ANKARA – U qoyumo Suryoyo Tuma Çelik bi rmoyto du şwolo dımqadamle cali sbutho dmahıt ido me Toki dkıtyo şırke du bnoyo da bote masırto bi şultonutho d’Turkiya cali cito d’Mor Batlo d’Arbo uda bethqbure, lu waziro di mardutho Mehmet Nuri Ersoy ulu waziro di xazina Nureddin Nebati komır: “ anarcotho di qritho d Arbo dkito bgawayye i cito d’Mor Batlo wa bethqburayda, bu zabno du fulhono du kadastro, mqaydi cal ışmıd di Xazina. Elo bıthır a mulkonani bu siqumo d’21 Teşrin u Haroyo 2022 hiwi l’TOKİ.”  

Çelik bi rmoytayde kmawdıcste, a mulkonani ma zabne qadmoye hollocdo du Waqıf Suryoyo d’Midyad di Dayro d’Mor Gabriel’ne. U Waqfano dkıtle u statu di jamaca, kıtleste zıdqo dwele mulkone.  

U Qoyumo Suryoyo ba melani mdawamle “a fulhone du kadastro dıkımdawi hani ışne yarixe bu qlimo, leşan da Suryoye kmisomi b’idactho noquse u fawde. Mawxa bu rişo u waqıf d’Mor Gabriel u waqfat hreneste bi netije da fulhone du kadastro ğalabe ma mulkonaththe şafici lidothıd di Xazina awste l’şutose u farsufe dlatte asirutho. Wu qdomano mu heş kımdawım.”  

Çelik a şwolani mşayele lu waziro di mardutho udu turizm Mehmet Nuri Ersoy,

• Mın fulhone sımxu calu qdomo lo kino dsımla i wazirutho mqabıl da waqfat da jamacat?
• Hal kıtxu fulhono leşan kletu qamuthıd du tehwiyo da arcotho da Waqfat da jamacat li xazina?
• Gıdşıfcitu li harake leşan dmakletu u tehwiyo dan arcotho du Waqıf d’Mor Gabriel l’TOKİ?   

Wa şwole dımşayele Tuma Çelik lu waziro di xazina Nureddin Nebati hanine:

• İ arcathe cam gabıd dkıtyo du waqıf d’Mor Garbiel qay mqaydo cal ışmıd di xazine?
• Mıqa arcotho d’Mırde ba 2 ışne haroyani mqaydi cal ışmıd di Xazine?
• Qay kito mkono da arcotho dkıtlın statu d’Cito u Bethqbure dmitahwın l’TOKİ?
• Bi sbutho da arcotho da citotho uda waqfat laybın dmiqaydi cal ışmıd di Xazina kıtxun fusqono aw lo?