İ cito d’Mor Yuhanun b’Mırde mahto me hatho lu zebono

İ cito makthabzabnoyto du camaydan d’Mor Yuhanun dkıtyo b’Mırde naqla hreto mahto lu zebono bu darbo du nawlo.

 Cıl mıd mahwe hfuxyo mu camaydan u me şutose mşahılfe, citathe ğalabe naqlat mahto lu zebono bcayni timo, me farsufo dıkımdace di citathe fayışleyo mu babayde.

 İ cito Suryoyto d’Mor Yuhanun dkıtyo 1700 eşne catıqto u dkıtyo b’Mırde, naqla hreto mahto lu zebono b’timo d’7 mılyune 250 alfo lirat bu darbo d’şırke dıkımzabno mulkone du nawlo. Bu iclan du zebono kmitawmır, i citathe msajalto’yo mi daira di bethcatiqotho, kito bgawa 3 qabre d’kohne, u 2 hlile. U kmitathkır, i citathe mulk dfarsufo’yo-dfayişo me Murat Aycun lu abrayde İbrahim Aycun. U farsufano mahıtwole i cito lu zebono meqım 5 eşne, u meqım 3 yarhe, naqla hreto mahto lu zebono ba yawme dşafıcina.

U camaydan me meqımste mahwewole hfuxyo wu ucdoste u hasyo di Marcitho d’Mırde u Omid Mor Filiksinos Saliba Özmen tlıble ma şutose dkıtlın asirutho bi sbuthathe dşufci li harake u mırle, İ citathe naqla hreto dmahto lu zebono mahişono’yo. Ahna kıbcina i citathe dmitahwiyo lu waqıf di Dayro du Zacfran. En dhowewolan mkono gıdzawninawola elo kıltan sabro, a şutose dkıtte asirutho dmaydi a tedbire dıklozım.

U qoyumo di HDP Necdet İpekyüz dsımle fulhone bi sbutho di cito, sımle sturyo i şultonutho u mırle; İ dawle klozım bcayni şıkıl dımqadmo la dkotho di tawditho kulle. Elo i şultonutho cal maqlıb du medano ksaymo, lıkmtaybo buhone u kfayşo şlitho. İpekyüz m’akadleste dkull noşo klozım dnofıq mqabıl du medano. İ cito aydarbo hawyo mulk d’farsufo? B’zabno da bnaynoşo fayişi jbiroye dtorın mu cafraththe, u hın farsufe mahıtte ido cala dkothao di tawditho. İpekyüz sımle qroyto li wazirutho di mardutho dşufco li harake, dmaqimo u iclan du zebono di cito, u dmicadlo.

U qoyumo d’HDP m’akadle, b’Turkiya kito şwolo di qaçaxçıtiye da athare makthabzabnoye. U medano kmisım cala athare dlatne Maşılmone. U rişono du Mawtbo da Suryoye d’Mırde İliye Kırılmaz’ste mırle; Sim tapo mzawro. U medano kıtorinale li rahme di dawle. Hzinoyono ğalabe. U rişono du waqıf d’Mor Gabriel Quryaqus Ergün bi maqırhonutho dhule l’sfaryawmo tlıble di şultonutho dımdaxlo li sbutho u dobo i cito la Suryoye.