İ dafo d’Caynkawa grışla u zuhoro calu dyoşo da arcotho du camaydan

U camaydan d’Caynkawa du garbiyo du Iraq, cıl ma qroytotho dıksoyım li şultonutho du qlimo d’Kurdistan leşan dmitaklın a dyoşe dıkmisomi calan arcothayde, elo naqla hreto b’şıkıl ftiho kımdawmi.

U tbocofroso gawoyo d’Caynkawa, ba mawdcınwotho haroye dfrısle, grışle u zuhoro cala mşale du camaydan dıkmacımsi caynothaye cali sbuthathe.

İ dafo d’Caynkawa dıkmıfroso bu darbo du facebook bu ışmo “ido bido leşan d’Caynkawa”, bu buyono dfrısla mawdacla dıkmdawmi a dyoşe dıkmisomi cala arcotho du camaydan di mdito, u grışla u zuhoro dilonoyith calu grofo dan arcotho di zarocutho mqabıl du bnoyo d’kunoşe d’bote di şırke Kurdoyto d’Lalaf. İ dafo bu buyonayda mawdacla’ste dsımla qroyto lan abne di mdito ula mşale di şultonutho du qlimo, bnişo dmitaklın a dyoşe dıkmisomi calu camaydan.

Bebzabno, i dafo mathkarla d’camıhbol hulucdo lo hiw funoyo la qroytotho da comure d’Caynkawa, bnişo dmitaklın a dyoşani dcala arcothathe, u mawdacla di şırke Kurdoyto kımdawmo bi tarmithayda du bnoyo da bote dıkmizabni b’timo celoyo wu camaydan’ste latne mkone d’şoqıl hawxa bote, elo belhude a catire wa nuxroye dkibın d’şuqli a botani a hathe. İ tarmithathe kmisomi cala arcotho da akore du camaydan d’Caynkawa, u mqabıl dathe’ste lıkmitahwelın tazminat.

İ dafo bu buyonayda mırla; Ksaymina qroyto la mathlonaydan bu parlamento ubi şultonutho du qlimo d’Kurdistan ubi qadmoyuthathe u rişono du diwan di rişonutho du qlimo Fawzi Alhariri wu waziro du nqolo Ano Jawhar dmaydi i mşalutho u dşufci li harake leşan dmaklın u dyoşano dıkmisım calu camaydan. Udothe dımdawmi a dyoşani i naqlayo kull mede ftihoyo qumayna b’şıkıl qonunoyo, u gıdsaymina tagliyotho mşayne u gıdmiqadım şkuwat la rişizgade u mathlonwotho-dilonoyith i izgadutho du Vatikan.

Bu huthomo du buyonayda, i dafo mawdacla du tekrar da dyoşani gıdtofık i claymuthaydan li golutho, u gıdmaxle u Iraq mu camayde u şerşoyo, wu makthabzabno lıgmarhım i şultonutho du qlimo d’Kurdistan cal dıkmıştacyo dawro hfito bu texliyo du Iraq ma Mşihoyayde.