İ dafo d’İndependent frısla mimartho cali ulsoyutho du leşono Suryoyo bu Cıraq

I sferyawmo Britanoyto d’İndependent bi mimarthayda dıfrisola bu calway “u Suryoyo bu Ciraq leşono mdinoyo yo dıkmahwe mrodo mqabıl du qşoco”, mawdacla dbıthır mi şaryutho du Ciraq bi şato da na’1932 huwwo fsoso dmitahragwo u leşono Suryoyo ba madraşyotho da citotho, wu medano mdawamwole huli şato da na’1968. Ubi şato da na’1970 i şultonutho du Ciraq maqbewola dmişatıs kunoşo yulfonoyo du leşono Suryoyo.

U kunoşano dımdawamwole 10 ışne, hawiwo bıthır falqo mu kunoşo yulfonoyo du Ciraq uha ma fercayde bu ışmo di dayira du leşono Suryoyo. Ubi şato da na’1991 mawlıf u leşono Suryoyo bu qlimo d’Kurdistan du Ciraq ba maşıqle mşahılfe şarwoyo, mescoyo udu jumnasiet. I sferyawmo d’İndependent mawdacla ste dbu haqlo du yulfono celoyo du Ciraq kito tre ferce dıkmawlıfi u leşono Suryoyo ba botaysawbo, baynothaye ferco da leşone bi bethsawbo d’Boğdod dımşatıs calu talab dhawiwola i sictho Suryoyto du kunoşo yulfonoyo du Ciraq.

U mdabrono gawonoyo du yulfono Suryoyo bu Ciraq Cimad Salem Jajjo bi maqırhonutho dhule l’İndependent mırle “ıno kıtli sabro rabo bu dactid da talmidhe dkıtne ba madraşyotho, u leşono Suryoyo layto mkono dmıqşıc cal dkıtyo leşono hayo dkıtle şerşe camuqe dıkmotın l’olufe d’ışne. U leşonano fayoşoyo cıl ma casqıwotho dkito, dilonoyith dkıtyo u leşono gawoyo awkith baytoyo da yolufe dıkqorın u leşono Suryoyo. Ucdo ste kito tarmitho dıkdırşinala bi sbutho dmişadır şbile du leşono Suryoyo la n’athrawotho di golutho, laşan dmıtlıb ma rişone tawdithoye tanone dmawlıfilın la nacime”.

Lfuth Jajjo, mhalıq dawse msimonitho bu Ciraq bi sbutho du tewlifo du leşono Suryoyo, u hathe ste bıthır m’şişaltho d’qonune dımbayni laşan du snodo du tewlifayde bu athro, u mawdacle du leşono Suryoyo kothe bu darğo tlithoyo bu Ciraq bıthır ma tre leşone Caraboyo u Kurdoyo, elo i dawse rabtho dımhalqo bu qlimo d’Kurdistan yo, cal dkito sferyawme u mğale dıkmıfrosi bu leşono Suryoyo, ucal dkito frosqolo u froshezwo, ucal dkito ste madraşyotho dıkmawlıfi a’şbilaththe bu leşono Suryoyo awkith lobalhude kmawlıfi u Suryoyo xıd leşono, elo a’şbile kulle kmitawlıfi bu leşono Suryoyo.

İndependent grışla ste u zuhoro cala casqıwotho dıkkolın b’qamuthıd da qonune uda tahrazyotho dkımnasın dnıfqi moro lu leşono Suryoyo ubi qadmoyuthaththe i golutho du camaydan mu athro. Cali sbuthathe, Jajjo mawdacle dkıtwo meqım ma hçome dı Dacış 240 madarşyotho dıkmawlıfiwo u leşono Suryoyo bi daşto d’Ninwe udıkmıştawtafwolın 21 alfo yolufe.