İ daira dan athare d’Nuhadra ftıhla dacwa mqabıl d’Lexus bıthır mıd i şırkathe huwla husrono l’duktho du arkeoloji dkıtyo 3 alfo eşne catiqo

BETH NUHADRA, Ciraq – İ şırke Yabanoyto d’Lexus, frıswola methhawyonutho d’model hatho da radoyothayda dqulcowa calu geşro catiqo d’Jerwan b’Nuhadra-dkıtyo 3 alfo eşne catiqo. İ methhawyonuthathe, bıthır frisowa bu tbocofroso kenşoyo. U geşrano bnewo 690 meqım me Mşihoyo bu zabno du malko Othuroyo Sanharib leşan u nqolo da maye ulu teştiyo dan arcotho di mamlaxtho.

U geşrano, kmifaşıq xıd remzo di duktho ucalu reklamano dsımla i şırke d’Lexus, mahwela i daira dan athrare di hiğmonutho d’Nuhadra hfuxyo qaşyo u mawdacla, dhiw husrono li dukthathe du arkewologi. Calathe i daira dan athare ftıhla dacwa mqabıl di şırkathe da radoyotho u maslımo lu mqımdino d’Nuhadra ulu bethdino d’Sheikhan.

İ daira dan athare udi yortutho d’Nuhadra mawdacla, di şırke twırla u şuro du tino di dukthathe dıkmişakıl xıd thumo dıkmonıc u cboro. Calu husronano dhiw, i daira tlıbla dmiçazyo i şırkathe bu hawbo yaquro dkulle lfuth u qonuno du qlimo u m’akadla cali sniqutho dkito, dmitaqşın a qonune leşan u sutoro dan athare u dukotho catiqotho du athro.

Mawdıc du geşrano dkıtyo berule makthabzabnoyo, bnewo me 2 milyone d’qatore dkull ha menaye beyn 250-500 kilowiye’yo. U geşrano 9 metrowiye celoyo u 20 metrowiye fathyo’we ubı gawe şufciwo a maye xıd sistem mşawşıto du teştiyo dan arcotho. U geşrano mqafewo ban 1850 me izgado Franşoyo bu Cıraq u kmifaşıq xıd warathe, di yortutho catırto dan Othuroye dkıtwın yadıcthone u xaloqe bu yulfono celoyo dkıtwolın.