Rişono d’USUP Brahim Murad calu şekolo dı şultonutho hathto b’Lebnon, “şultonuthathe dkıtyo zabnoyto udlo xaylo”

TUR LEVNON/METN, Libnon – Mşaqlo şultonutho hathto lashan u athro di Libnon. I şultonuthathe gduwyo bi rişonutho du rişwazire Nawal Salam dkıtwe meqım rişono du bethdino Emwothoyo di Kinutho. İ şultonuthathe dımşaklo bıthır eşne d’xalyutho, krize u hbose Emwothoye, gıdmidabro me 24 wazire.

Elo u mede dıkgorış u zuhoro, walaw sim hbose frişe me Amerika, frişo naqla hreto i wazirutho du momuno l’Yassin Jaber-dkıtle barmothoyutho Amerikoyto u qariwo lu gabo d’Amal du rişono du parlamento d’Lebnon Nebih Berri u dkıtyo sanodo d’Hizballah. Elo a Şica dkıtte ucdo 4 wazirwotho, latle haylo makfıyono bu myodo da fusqone.

U xaylo da mşihoye zayid bi şultonutho hathto

Camathe’ste u gabo da Haylawotho Lebnonoye’ste mıdle 4 wazirwotho-di baroyutho, du energi, du endustri udi wazirutho da galwoye wu rişono catiqo du Waqıf Marunoyo d’Britho-Charles Hajj mıdle i wazirutho du telekomunikasyon.

U gabo da Katayyıb d’Sami al Gemayel kıtle ha waziro wu Zawco Athronoyo Hiro d’Gibran Basil şafıc xıd saqıbloyo.

An Armınoye qayıthlın i wazirutho di Claymutho udu Spor.

şultonuthathe dkıtyo zabnoyto dlo xaylo

Bi maqiblonutho di simlan camu rişono d’USUP Brahim Murad calu şekolo di şultonuthathe mirle Murad dlatyo thnihoyo di wazirutho du momuno hiwo lu gabo d’Amal-Hizballah-dhuwle husrono rabo lu athro bi siyase dmaşele xıd noqufo du İran.

Calathe Murad m’akadle cali ulsoyutho di şaryutho da gabe Mşihoye dıklozım dhowelın zıttır haylo u mawdacle u sabro dkıtte da Haylawotho Lebnonoye dqudri dmıştacın u dawrathe. Murad kıhoze u tehwiyo di wazirutho di baroyutho la Haylawotho Lebnonoye dawse towto dı bu şikkilano u xaylo di Hizballah komitwir bi baroyutho du athro sagi naqis.

Murad mawdacle’ste dlatle ğalabe ntarto rabtho mi şultonuthathe dkıtyo zabnoyto hol dmisomi a guboye gawonoye du athro bi şato da 2026.