İ egartho dımşadro laşan isbutho di eqartho d’Diril grışla u zuhoro du tboco froso u nqilo lu parlamento d’Turkiya

I egartho dıfriso bu insiyatif du Huyodo Suroyo d’Urifi-ESU wi iqartho d’Şmuni u Hurmuz Diril cam 36 şutose u tukose Suryoye-Othuroye-Kaldoye cali sbutho d’Hürmüz u Şmuni Diril nqilo lu parlamento d’Turkiya u mıdla duktho bu tboco froso.

 Bi egartho dıfrisowa ba yawmotho dşafıcina, kmıtlıb dmidoco i ctidutho d’Hurmuz Diril u dmitanhır calu qatlo d’Şmuni Diril dıhtifiwo meqım şato.

İ egartho ftıhto dıfriso me casrowat şutose du camaydan cami iqartho d’Diril, la şutose Emwothoye, la şultonwotho u lu tbocofroso, ksaymi qroyto li wazirutho di kinutho d’Turkiya dsaymo buqoro zalilo, şroro u dlowe ğnizo leşan dmımte l’netije cali ctidutho d’Hurmuz Diril wa qatole d’Şmuni Diril dmihaşwi.

U qoyumo du gabo Demoqaroyo da Came Saruhan Oluç nqile u talab da 37 şutose u di eqartho d’Diril lu parlamento d’Turkiya. Bu mamlayde Oluç dkıtyo u rişono du grub da qoyume bu parlamento d’Turkiya mırle; Beynothaye i iqartho d’Diril 37 şutose u tukose Suryoye-Kaldoye-Othuroye frıslın egartho ftıhto leşan dmiqafe Hurmuz Diril dhani zıd me şato dlayto xabro mene, u dmitanhır u qatlo d’Şmuni Diril. İ egarhathe ğalabe ulsoytoyo, mşadro la şutose d’Turkiya u la şutose Emwothoye. A nacime, i iqartho wa hawrone d’Diril kımmi; kıbcina dıdcina i şrorutho, elo hol adyawma lo mhalıq dawse. Kito fusqono di ğnizutho bu buqoro dıkmisım, mawxa late xabro calu buqoro. Ahnaste naqla hreto kmaşmıcina marke iqroyto da şutose tukose Suryoye-Kaldoye-Othuroye, u dmitahwe funoyo lu mede dıkmişayıl acle.

İ egarthathe dıkthiwo bu insiyatif du Huyodo Suroyo d’Urifi-ESU cami iqartho d’Diril, mıdla dıktho bu tboco froso d’Turkiyaste u hın ma dafe da tebe dıfrıslın i egarthathe hanine, Gazete Duvar, Artı Gerçek, u Ajans d’Mezopotomya, u Ajans da tebe d’Fırat. Bu yarho d’Konun u haroyo ba 2020, Hurmuz u Şmuni Diril htifiwo mi qrithathe Mıhre dkıtyo b’Şırnaq. Bıthır mıd mvayci b’70 yawme i iqartho mqafela i şlado d’Şmuni Diril elo Hurmuz Diril heş layto xabro acle u heş mvaycoyo.