İ finotho d’Caynkawa gıdmidabro bıthır mucdo ma comurayda i sagiyoyuthathe dkıtne mşihoye

U rişwazire du qlimo d’Kurdistan bu garbyo du Iraq-Masrour Barzani hadır bu zawho du şuhlofo di qastra d’Caynkawa, l’finotho dgmidabro bıthır mucdo ma comurayda. İ sagiyoyutho d’Caynkawaste ma nabne du camaydan.

Lu zawhanoste, hadır u hasyo di cito Kaldoyto d’Bobel Mor Başar Warda wu rişono du tukoso di mcadronutho la Mşihoye-CEO, mqadamle egartho d’tahınyotho lu fusqonano dmıdla i şultonutho d’Arbil.

U rişwazire du qlimo d’Kurdistan Masrour Barzani mırle; Caynkawa, gıdhuwyo i fnitho rabtho da Mşihoye bu Madınho Mescoyo. A melani d’Barzani miri athmıl bıthır mu zawho dsim leşan u futoho di fnitho d’Caynkawa dımşaryo dhowela mdabronutho d’ruha.

Barzani mırle; Fsıqli adyawma dmahıtno i qastra d’Caynkawa d’Arbil, tahte du duyoqo d’mdabronutho ma comurayda a Mşihoye. Bu şıkılano, kmitahwe zedqo la Mşihoye u la ğrobe hrene hınne dımraşhi rişone dımdabri, dhayri cali mşaynutho di fnitho u dımşakli a şutosathe a hrene.

Wu plan dkıtla Arbil bi tarmithatheste, dmitahıt folitiqore u hadome du gabo di KDP ba wolyotho frişe di fnithatheyo. U mede dıkgorış u zuhoro, u şuhlofano d’Caynkawa me Qastra l’fnitho wi socurutho dsimo li bethkrihe du camaydan, mtaybi bu zabno dımqarawlın a guboye gawonoye du Iraq.

Masrour Barzani, sımle’ste socurutho li bethkrihe dilonoyto di cito Kaldoyto d’Bobel-d’Yuldath Aloho b’Caynkawa, dbınyola i cito bu snodo momunoyo d’Amerika udu Huyodo d’Urifi. U hasyo Mor Başar Warda mhanele u fusqonano d’Arbil leşan u şuhlofo d’Caynkawa l’fnitho u mırle; Hano fusqono ğalabe ulsoyo’yo u kıtulbina mu camaydan dfoyış bu Iraq ubu qlimo d’Kurdistan.

Camgabedathe Franklin Graham dkıtyo evangelikoyo Amerikoyo wu rişono du tukoso du snodo dla Mşihoye-CEO, mqadamle tawdiyotho l’Barzani dımbayanle Caynkawa xıd fnitho udu şuhlofano, gıdmcadır u gıdmşawşıt a Mşihoye wa qalilotho hrene di fnitho.