İ mdabronutho d’Amerika rfıdla dmıştawtıfo li rmoyto hathto d’Emwotho Mhaydotho leşan u snodo di mlahmonutho da thume d’Ukraina

WOSHINGTON – Amerika meqım kull naqla sundowa a rmoyotho d’Emwotho Mhaydotho cali sbutho d’Ukraina, elo lfuth a mawdconwotho dımatile u ajans d’Reuters me 3 mşale Amerikoye, i şultonutho kırufdo dmıdyo rmoyto hreto Emwothoyto leşan u snodo d’Ukraina uda thumayda ubebzabno, dıkmıtlıb bi rmoytathe d’Rusya gurşo a folhayda. İ celtho dıkmahwıyo Amerika’ste ilo awyutho dkito cali maqırhonutho di rmoytathe dmıstacmılo b’G7 u b’Emwotho Mhaydotho’yo dıkkurho a hçome da Rusoye’yo. İ rmoytathe gıdmimodo li ido yawme d’Tre dothe, u mucdo mıdla u snodo dhol 50 athrawotho.

Me gabo hreno u rişqutno d’Ukraina Zelenskij laqi athmıl u mşadro d’Trump-Keith Kellogg u m’akadle, dkıtne hadire dmodın qyomo di mşaynutho cam Amerika. Elo calu talab d’Kellogg, lo mtayıb knuşyo lu tbocofroso b’Kiev.U ton beyn du rişono Amerikoyo udu bar’amnayde u Ukrainoyo bu maşıqlano ğalabe celoyo’yo. U mşawrono di mşaynutho Athronoyto d’Amerika Mike Waltz grışle u zuhoro d’Ukraina d’maşılyo ruha u mırle l’Zelenskij b’Kiev; Manhıt u tonaydox u hor towo calu qyomo dcala macdane u mdhay u qyomo. Heş latyo mwaxro, dmicadli a esore beyn d’Amerika u Ukraina.

Leşan u snodo d’Ukraina, tlıbla Woşington mena dobola macdane b’timo d’500 milyare dolare. Bebzabno Waltz dım’akadle d’Amerika heş kısundo u mluwo da 5 du qyomo du NATO, sımle’ste u Huyodo d’Urifi sturyo u mırle; Amerika layba dobo hem u masraf du qrobo d’Ukraina u hemste da hayle di mşaynutho d’Urifi. Athi u zabno d’Urifi’ste dtucno i mşaluthayda. Bu zabno qamoyo dhawile u rişono Amerikoyo Trump bu Qusro Heworo, sımle mamle dxlıqlın zmomo u hfuxye mşahılfe u mawdacle dkobıc i morutho d’Grönland u d’Ğaza.

U qedomano d’Trump’ste, kımadıl dkıtyo tagoro rabo u yadıcthono da bazare. Elo u strateji dkıtle Trump bu haqlano di tagorutho, kull naqla lo krukwi bu haqlo siyase dbritho u kibın dımşakli qento rabo. Trump kobıc dmadhcıf Zelenskij ba droşe du şlomo wu towo kodıc’ste, d’Ukraina sniqoyto’yo u masırto’yo bu snodo folhoyo d’Amerika. Trump kobıc xayifo dımsafe u şwolano beyn Rusya u Ukraina u kısoyım hboso cal Zelenskij leşan dmisım guboye gawonoye bu athro.