Mfarqıc tlotho base bi arişkoyto d’İsroyel Tel Aviv; Netanyahu huwle amro lu gayso dsoyım cuqobe cal Dıffa i Macırboyto

TEL AVIV, Isroyel – Dafe frişe d’İsroyel frıslın tebe cala 3 base dımfarqıci athmıl casriye b’2 zabne frişe bi nuqazto da base d’Bat Yam bu taymno di arişkoyto. Bu zabno dımfaqıci a base latwo noşo ebeye elo u hçomo mid li ido, xıd nesyuno d’hçomo marhıbono u lfuth u polis, mqafelın 6 foqucotho dsimiwo bi ido.

Cala hçomani dhawın’ste, a hayle di mşaynutho maqşelın u duyoqo di mdito u tlib ma qaloce da base, dhayri towo ebeye meqım mu qloco. Camathe’ste mabde buhone ma istixbarat du athro leşan dmiqafe ithbate u dmıhkomi a hayobe. Elo holucdo’ste heş noşo lo mıdle i mşalutho da hçomani cal ruhe.

Wu rişwazire Netanyahu mahwele hfuxyo qaşyo u huwle amro lu gayso dmabde cuqobe casye cal Dıffa i Macırboyto. Me gabo hreno a hayle di mşaynutho d’İsroyel mawdaclın dhdo ma şlade dmaslımo athmıl me Hamas, latyo d’Şiri Bibas dkıtwe i emo da 2 tloye dımvayaclın a hayathe bu zabno dkıtwın msike mu zawco Fleştoyo. A hayle di mşaynutho mawdaclın dımthabto i hiyoyutho da 3 farsufe dmaslımi elo dan 4 latyo i athto İsarloyto.

Calathe u rişqutno wu rişwazire thımlın Hamas, d’dışle u qyomo di şalyuthzayno u dıklozım baroyo dmitadcıro i şlado d’Bibas. Bi sbuthathe’ste Netanyahu huwle şudoyo, dgıtole u hayif cal d’hathe kımadilo, d’Hamas latle iqoro li noşutho. U zawco Fleştoyo d’Hamas, mawdacle’ste adyawma i hiyoyutho da 6 yasire dgımarfe ramhıl-dkıtne 2 menaye hedor an 40 eşne wa hrene hedor a 20.