U Tukoso Emwothoyo di Galwoyutho: ma 2014 uholucdo hniq u mvayıc hol 52,000 galwoye

BRITHO — U tukoso Emwothoyo di Galwoyutho, frısle i netiçe da buhone dsımle calu mınyono da galwoye dımvayaclın a hayathe bu zabno dımnaselın dızzın lğer athrawotho leşan dım’amni a hayathe uda yaqrothathe. U tukoso Emwothoyo kımawdıc, ma 2014 uholucdo mvayaclın 52 alfo bnaynoşo a hayathe; acmaye’ste farsufe dımvayci.

Ba 2024 lhude, matiwo 8.963 galwoye l’İtalya u Spania wu adşato, u mınyonano 11 alfo bnaynoşo’yo. U mınyono da galwoye mithe bcayni şato 8 938 farsufe’we. Bu taşrorano İOM kımagle, di sagiyoyutho da galwoyani dımvayaclın a hayathe ba darbone, lo bu sebyonathe mgalwelın elo mcal fothe da krize folitiqoye, da qrobe, cali lo mşaynutho dkito, mcal fothe da gunhe du kyono uğer krize noşoye hawın celtho li goluthathe.

72 ba mo du mınyono da galwoye dımvayaclın a hayathe, bu zabno di şalqa rabtho di golutho dhawyow ba 2014’ne. 39 alfo bnaynoşo’ste qtili ba dukotho dıkmdawmi ebeye a krize wu 13.500 farsufe mvayci bu zabno dabici dmahzımi. Mawdıc’ste da hşowani, kibın dhowın cleytır mu mede dkıtyo mqaydo.

İ rişonitho du tukoso Emwothoyo-İOM Amy Pope kımmo; A hşowani, b’haşo rabo kımamtın lbolayna u qento rabo dıkmahti a bnaynoşo qum caynothaye leşan dkurxi cal gado dcayşi b’şlomo. Calathe klozım dobina yuqro u xulqina mkone hathe-dhuwyo i golutho b’sebyono hiro ulo dmıjbori a bnaynoşo li golutho.