İ şultonutho du rişono Amerikoyo Joe Biden mkararla ikleyteyda wi lo thnihuthayda mqabıl du İran

U zabno u qamoyo di mdabronutho hathto d’Amerika, kışofıc ba esore u ba mamle dıksoyım u rişono Joe Biden cama bnayamnayde dathrawotho frişe dı britho.

 Camatheste i şultonutho du rişono Amerikoyo Joe Biden, mkararla i klaytayda wi lo thnihuthayda mqabıl du İran, dhowe moro d’zayne nukleer.

U rişono Amerikoyo Joe Biden dhawile 3 şabe bu Qusro Heworo, wu zabnanoste şafıc bu zyodo bu mamlo da telefone dhawile cam rişone dathrawotho frişe dı britho dkıtne bnayqyomo d’Amerika; beynothaye hadome du NATO, d’Urifi, uğer. Biden, hawile’ste mamlo camu rişono Rusoyo udu Sin, bnişo dmitaxifo i m’watyutho dbeynothaye. Elo u mede dıkgorış u zuhoro-bu zabno d’Biden hawile’ste mamlo cam rişone frişe du Madınho Mescoyo, holucdo lo sımle telefon lu rişwazire d’İsroyel Benyamen Netanyahu.

Elo lfuth i malılto du Qusro Heworo, Biden cal qariwo gıdhowele mamlo camu rişwazire İsarloyo. Bebzabno Biden, heş lawile mamlo camu rişqutno Turkoyo u hathe kmifaşqo, xıd klayto mqabıl d’Ankara. Me gabo hreno mawdıc d’Biden gıdmcaqıb i sbutho du hbuşyo d’Guantanamo dkıtyo b’Kuba, bnişo dmafıt u fusqono du rişono catiqo Barak Obama la haye u d’soxır u hbuşyano-dkibe 40 hbişoye dhani 20 eşne heş lo sim u bethdinathe, cal dkıtne qento rabo en dmitarfın.

Megabo hreno u malolo di wazirutho di baroyutho d’Amerika Ned Price m’akadle, du athrayde lıkmaqbıl du İran dhowele zayne nukleer u mırle; U rişono Joe Biden b’qrihutho mawdacle dlıkmaqbıl du İran dhowele soruhe nukleer u kubcina bu darbo du hboso diplomatiqoyo dım’akdina u medano-u İran lıkowe dhowe moro d’zayne nukleer.

Yawme d’Arbco d’şafıcina u tukoso Emwothoyo du Atom udu Enerji-İAEA maglewole, du İran bıdele bu snoco du uranium metal-dkibe dmitıstacmıl leşan u bnoyo d’foquctho du nukleer. Calu tebanoste, Amerika, Rusya, Fransa wu ucdo’ste Almanya u Britania mahıtte klayto mqabıl du İran u krıhlın a fulhonani.An athrawothani sımlın qroyto l’Tehran, baroyo u dlo tehito d’şartat dmaklıyo a fulhonani ubı dukthaye, d’ducro li tahrazto du nukleer dımbaynowalın meqım camhıdode.