İclaymutho di daşto d’Ninwe mtayabla cadcido bi cohnutho di socurutho du Papa

İ claymutho du camaydan di daşto d’Ninwe, mtayabla cadcido camonoyo bi cohnutho di socurutho dıkmıntır dsamla i qadişutho du papa Mor Fransis Qadmoyo lu athro du Iraq, u dilonoyith li mditho Suryoyto d’Bağdede.

Bu cadcidano dımtayıb bı Bağdede, mqadım hfitwotho mşahılfe baynothaye halxe, qole citonoye, zmirotho, sport u mamle cali mıcne di socurutho du papa.

Bu nişo “i claymutho di daşto d’Ninwe kımhalhılo lu papa”, hedor alfo clayme u claymotho du camaydan d’Barıtle, d’Bağdede, d’Bacşiqa ud’Karamles, mtayablın cadcido camonoyo bi mditho d’Bağdede bi cohnutho di socurutho dgıdsamla i qadişutho du papa Mor Fransis lu Iraq hamşo bu yarho d’Othır dıbqamuthayna u dgımdawmo hul tmınyo bu yarho.

Lu cadcidano, mıştawtafleste u rişono di marcitho d’Mawsal u d’hedora da Suryoye Qatholiqoye hasyo Mor Yuhanna Bıtrıs Muşe, wu rişono di marcitho d’Mawsal di cito Kaldoyto d’Bobıl hasyo Mor Mixayel Nejib, u menyono ma kohne u dayroyotho.

Bu şuroyo di hfituthathe, i claymutho dlayimo qum di cito d’Mor Bahnam udi hothayde Sara, mhalaxla lafu salon d’Alhaytham d’Bağdede, ukıtwo b’qamuthaye i gudo da boduqe d’Mor Gorgis d’Barıtle. Bu salon dlayimo ebe i claymutho Suryoyto mtayıb slutho mkanaşto, u hew fuşoqo lu sukolo du slogan du cadcido.

Bıthır mathe, qaşişo Rony Momika sımle mamlo bışmıd di sictho mtaybonitho di socurutho du papa, ubıthır mu qolo citonoyo mkanşo mqadım ste mamle m’qaşişo Mazen Mattuka, dayroyto Slivya, qaşişo Fransis Baqtar u dayroyto İbtisam.

Camgabıdathe, i claymutho di daşto d’Ninwe maglela cala mawhabyothayda, ubu tarano i gudo d’Milody mqadamla zmirotho, sim show du sport mi claymutho d’Bağdede ud’Karamles, u mqadım ste qole citonoye mi gudo d’Mor Yawsef d’Karamles.

Bıthır mathe, hasyo Mor Yuhanna Bıtrıs Muşe u hasyo Mor Mixayel Nejib ba mamle dsımlın, mahkelın cali mıcne di socurutho du papa dilonoyith li mditho Suryoyto du mrodo d’Bağdede.

U cadcidano hthim bi hşamto di hubo dıflığla i claymutho camıhdode.