İmşalonitho du Komisyon mdinoyo d’Turkiya du Huyodo d’Urifi mşayacla egartho lu rişono du Mawtbo d’Urifi

İ mşalonitho du Komisyon mdinoyo d’Turkiya bu Huyodo d’Urifi profesor Kariane Westrheim, mşadarla egartho lu rişono du Mawtbo d’Urifi Charles Michel cali sbutho du knuşyo dgısoyım u Huyodo calu athro d’Turkiya.

 Bi egarthathe dıfriso lfuth a qroyotho Emwothoye dsimi, cala fusqone wa rmoytho dımqadmi leşan u şlomo wi demoqratoyutho b’Turkiya, tlıbla Westrheim dmitahıt tedbire casye cali şultonutho d’Ankara.

İ mşalonitho du Komisyon mdinoyo d’Turkiya bu Huyodo d’Urifi-EUTCC proffessor Kariane Westrheim, mşadarla egartho lu rişono du Mawtbo d’Urifi Charles Michel meqım mu knuşyo dgısoyım u Mawtbo Urifoyo 10-11 bu yarhano. Hıdo ma sebwotho rişoye du knuşyanoste, u şwolo d’Turkiyayo.

Bi egarthathe dımşadarla Westrheim dımtaybo lfuth a qroyotho Emwothoye dsimi, cala fusqone wa rmoytho dımqadmi leşan u terkiwo du şlomo u di demoqratoyutho b’Turkiya, tlıbla i mşalonitho man athrawotho hadome du Huyodo d’Urifi uma şutose frişe du Huyodo, dmahti tedbire casye cali şultonutho d’Ankara.

Bi egarthathe rızla Westrheim 5 nuqze ulsoye beynothaye; dmimıd tedbire diplomatiqoye, folitiqoye u qonunoye mqabıl du gabo d’AKP u MHP leşan dımtabqi a qonune Emwothoye, dgurşi a haylathe me Suriya, mu Iraq, Libya, Qufrus, Qarabax u me dukotho frişe du yamo Mescoyo. Bu darğo qamoyoste, klozım dmitawfıqo Turkiya mu huyodo du gumruk u dmitakle u zebono da zayne lu athro.

Bi nuqzo trayonitho kıle calu şwolo da Kurdoye u tlib me Turkiya dımsafyo u şwolano bı darbo mşayno u demoqratoyo u dmaklıyo ukboşayda calu garbyo d’Suriya u du Iraq u dmitabde cal qariwo dialog folitiqoyo bu inisyatif du Huyodo d’Urifi beyn di şultonutho d’Ankara u da hayle Kurdoye. Bi nuqzo da 3’ste mawdıc; Dmitacbır u rişono da Kurdoye Abdullah Öcalan bu maşıqlano da droşe cami şultonutho d’Ankara.

Bi nuqzo dan 4 mawdıc; dmitaqimi a mnoce kulle dmahti cala mathlone u cala gabe Kurdoye bu taro du fusqono du bethdino d’Urifi u du bethdino d’Beljika-dlıkmfaşıq i PKK xıd tukoso marhıbono. Wi sbuthathe kıtla ulsoyutho rabtho leşan u terkiwo du şlomo. Bi nuqzo da 5’ste tlib me Turkiya dmarfıyo a hbişoye folitiqoye kulle dımnaqın ba guboye wa hadome d’HDP u dmitahwe iqoro lu sebyono du camo ba guboyani u dmitadcıri a rişone da karxwotho la wolyothathe.