17/06/2021

İmşatsonutho d’MUB leşan du camaydan u siqumo du ağuno di hirutho udu fusqono du tecliyo du rişo mqabıl di gracyuthoyo

Ba mele; U Mawtbo Umthoyo d’Bethnahrin, u strateji di zoxutho du camaydan’yo, kımşare u buyono dfrısla adyawma i Sictho di Rişonutho d’MUB.

Bi cohnutho di mşatsonutho d’MUB dkıtyo 18 Hziron kmitawdıc; İ mşatsonutho rabtho d’MUB leşan du camaydan u siqumo du ağuno di hirutho, udu fusqono du tecliyo du rişo mqabıl di gracyutho’yo.

 U buyono du Mawtbo Umthoyo d’Bethnahrin ba melani kımşare; 18 Hziron u yawmo şatonoyo di mşatsonutho da 21 ışne du Mawtbo Umthoyo d’Bethnahrin, wu iclan du sıbyono du camaydanyo. Bi hamlathe dathyo lu hwoyo bi netije du ağuno dıkmitahwe hani casrowat ışne; rfido i siyase du qşoco, i teslimiye wu troyo dlo athro.    

 U sebyono dıksoyım rişutho li mşatsonutho ulu ağuno du Mawtbo Umthoyo d’Bethnahrin, bi idactho di wolitho makthabzabnoyto kmoyıd cal ruhe i mşalutho du camaydan ma gabayde kulle u ftıhle warqo hathto. Cal du ağuno dmabde khobış bgawe dmılqe fotho b’fotho u dmıtlıb hşowo mkul şıkıl bcelıdbobo, u bcayni zabno kıtle nişo u camaydan ba timoyothayde, ubi hiyoyuthayde dmoyıd duktho me hatho bu masırho du makthahzabno. Hani dore u camaydan fayış jbiroyo dcoyış tahti mdabronutho dhayle hakome nuxroye, a şwolayde dlayimi cal hdode u dyariwi, mamtılelın şuryone doronoye. Şafıc u yawmo şatonoyo da 21 ışne di mşatsonutho du Mawtbo Umthoyo d’Bethnahrin, u cabırina li şato da 22 du ağuno, ubu zabnanoste kımdawım u qento wa gzome dcalu camaydan me xasawır frişe. 

 İ jeoğrafya d’Bethnahrin mahrıwo u mjarıb dmitatimi a şartat di cyeşe du camaydan. Bi siyase du tehriwo, du qşoco udu qrobo dmaşelın a rejime d’Turkiya, Suriya, Iraq wu İran magrış mrore lu camaydan ula came du Madınho Mıscoyo kulle, wi zıhniye du qtolğenso kmahwe dıgsaymi hawbe u gunhe hathe. Calathe xıd Mawtbo Umthoyo d’Bethnahrin kımhaymınina, inaqa a zawce demoqratikoye du Madınho Mıscoyo kulle dlaymi lıhdode, kibe dmaklın i marhıbonutho dıkımbarbızi a duwal dkıtne rakiwe bu qlimo. U ağuno dıkmitahwe mqabıl da bcelıdbobe da came uda tacobe, u mqabıl du sistem du gnowo udu tehriwo, leşan du xalas du camaydan kxolıq arcoyutho qwitho bdarğo qlimoyo u emtwothoyo. A şuşotani ktılbi menayna dmaqwena u dmarwıhina u stratejiyaydan dıkmoyıd asas lruhe i hirutho du camaydan. Mfothıd da sniqwothani gıdmaqwena zıttır u strateji umthoyo, folitiqoyo, diplomatikoyo u şutosoyo du ağunaydan. Bu maşıqlo dıbqamuthayna gıdmanhıtina la haye a tahrazyothaydan du fulhono bşıkıl tawtır. Gıdmafıtina li harake u camaydan bkul haqlo, u lfuth du maşıqlo gıdmawfıqina li holo u sıbyono du camaydan dımdabır ruhe u dımmathıl i hiyoyuthayde. Bu nişano ksaymina qroyto lu bınyonaydan kule ulu camaydan u mothonoyo, dmamtın li duktho a wolyotho umthoye dıknıfli aclayye, bu şbilo du nişo da sohdaydan, ubi idactho di olsoyutho rabtho u hayati dıklozım dmitahwe ağuno di hirutho.

İ mşatsonutho rabtho d’MUB leşan du camaydan u siqumo du ağuno di hirutho, udu fusqono du tecliyo du rişo mqabıl di gracyuthoyo. Bi ohnuthathe kımmina i mşatsonutho da 21 ışne du Mawtbo Umthoyo d’Bethnahrin howe brixo la eqaryotho da sohde, lu bınyonaydan u mtakso, ulu camaydan u mothonoyo Suryoyo Othuroyo Kaldoyo Oromoyo.

Tihe u Strateji di Hdoyutho udi Hirutho du Mawtbo Umthoyo d’Bethnahrin

Nihe a Sohde du Ağuno di Zokhutho Umthoyto du Camaydan.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…