Josef Sliwa sımle sturyo i şultonutho Iraqoyto

U qoyumo catiqo du camaydan bu parlamento du Iraq Josef Sliwa, mawdacle dkito zuctho du qonuno hatho du bethdino celoyo du Iraq, dımşahlıf u Iraq l’athro Maşılmono xıdu İran yaste l’bethdino di şarica d’Dacış.

 Camgabıdathe, hayle folitiqoye demoqratoye u tukose du kenşo mdinoyo nafiqi mqabıl du qonuno du bethdino Iraqoyo u mzaharlın ida dothe dmitaqbıl, gıdmaqşe i fliğutho dkito bıgawe du kenşo Iraqoyo.

 U qoyumo catiqo du camaydan bu parlamento du Iraq Josef Sliwa bi maqırhonutho dhule li dafo d’Şafaq News mırle; U bethdino celoyo kımathıl u sayfo haroyo du şroyo da qetre dkowın cala qonune du nomuso esonoyo. İ wolitho dkıtle u bethdino dımfaşıq a mluwe yo, u d’dorış i ruşmoyutho dhın qonune wa fusqone dıkmimodi me şutose di şultonutho. Qento ğalabe rabo’ne a fulhone dıkmisomi ucdo bnişo dmıkbış u bethdino du Ciraq ma rişone Maşılmone. Hın hayle kıbci dımşahılfi u bethdino l’athro Maşılmono du faqih du İran, u hın’ste kıbci dımşahılfile l’bethdino di şarica d’Dacış.

Bebzabno, Sliwa makadle du Iraq laybe dmıhkım mi şarica Maşılmonitho, cal du kenşo Iraqoyo kenşo mgawnoyo, wa rişone tawdithoye kito beynothaye ğalabe qetre cal sebwotho di şarica udi Maşılmonutho. Mawxaste u qoyumo catiqo du camaydan bu huthomo, mawdacle du kboşo du bethdino du Iraq ma rişone tawdithoye Maşılmone, i mıcnayde dmitahti a Iraqoye kulle bıgawe d’hbuşyo rabo, u dmıtfık u Iraq laf agenda da hayle kaboşe.

Camgabıdathe, grub ma hayle folitiqoye mdinoye du Iraq beynothaye u gabo da Komunist, mzaharlın calu qonuno du bethdino dkıtyo bu şıklayde ducdo, cal dgıdmaqşe i fliğutho dkito bu kenşo Iraqoyo. A gabani bu knuşyo dsımlın athmıl lu tbocofroso b’Boğdod, mawdaclın du bethdino kımathıl ha ma asase du sistem du nomuso esonoyo du athro, mawxa’ste u qonuno hatho du bethdino klozım dnofıq moro li mdinoyutho du nomuso esonoyo, u dsoyım u garanti da zedqe du camo Iraqoyo ba gawne mşahılfe dkıtle tawdithoye, umthoye u marduthoye.

Mxasra hreto, mathlone d’tukose du kenşo mdinoyo u hfite bu haqlo da zedqe noşoye, bu knuşyo dsımlın lu tboco froso, tlıblın mu parlamento d’Boğdod dımşawhır u quwolo calu qonuno hatho du bethdino hula guboye hathe, bnişo dmıdrış bırwihutho u dmisım u duyoqayde ma yadıcthone uma tukose du kenşo mdinoyo. A mıştawtfone, rfıdlınste a nesyune dkıbci dmafiti i tawditho lu haykılo du bethdino celoyo du Iraq, cal du medano gıdmaqşe u cnufyo wu furşono beyn da mathhabe.

Me gabo hreno, i şabake da came du qlimo d’Kurdistan du Iraq, sımla athmıl knuşyo lu tboco froso bu diwan di sictho şritho da zedqe noşoye b’Arbil, calu qonuno hatho du bethdino federaloyo du Iraq. Bu buyono dqre bu knuşyano, mawdıc du qonuno du bethdino kımathıl ha ma asase du athro mdinoyo, u kımathır mrimono cala qalilotho du Iraq.