Kmidawım dmisım duxrone mşahlıfe lu yowmo şatonoyo du Sayfo bı mdinotho mşahlıfotho

A şutose du Mawtbo Umthoyo d’Bethnahrin bi fnitho d’Örebro du Swed sımlın u duxrono şatonoyo du sayfo dkıtyo 15 hzirın qumi qoyumto du sayfo dkıtyo bu wahdo di cito d’Yoldathaloho da Suryoye ortoksoye.  İ tahrazto du duxronano dıfriso hayo b’Suroyo tv u mathlono d’MUB Yahkub nuhomo mahkele cali ulsoyutho du yawmo dilonoyo du camydan du Sayfo.

U duxronano mşarewole i şoctho ba tmone u falge bu mamlo du futoho dsımwola Sıtto Alan dı tlıbwola qatinto d’şıtqo cali ruho da sohde du cameydan.

Bıthır mi qatinto du şetqo u kohno di cito d’Mor Aho qaşişo Ablahad Daş maqımwole teşemşto da sohde u bıthır ste bu mamleyde tlıble mu camo dnofıq moro lu Sayfo.

İsa Yildiz dkıtyo u hadomo d’ESU mqadamwole Mimro calu duxrono du Sayfo.

Bıthır mathe matiwo u dawro lu hadomo du Mawtbo Umthoyo d’Bethnahrin Yahkub Nuhomo dmahkel cali macne di ulsoyutho du yawmo şatonoyo d’15 Hzirin dkıtyo yawmo dilonoyo du cameydan.

Bıthır ma  mamle dhawın i mqadmonitho du duxrono Sitto Alan sımla maqıblonutho cama hadire dmahkelın cali ulsoyutho du yawmano u di hdoyutho du cameydan.