Komisyon d’Urifi: Selahattin Demirtaş u Osman Kavala klozım mıtrın hire

BRUKSEL – Bıthır mu knuşyo dsımle u Komisyon d’Urifi makadle naqla hreto i klaytayde bi sbutho du terfiyo du rişono du gabo d’HDP Selahattin Demirtaş udu hfito Osman Kavala dkıtne b hbuşye d’Trukiya.  

Bu knuşyano, tlib dmitabıq u fusqono dmıdwo, dıklozım dmitarfe dlo kloyo u rişono catiqo Demirtaş. Be bzabno sim sturyo u bethdino du nomuso esonoyo d’Turkiya dıkmıwakhır u fusqono du bethdino, u tlib mene dımhalıkh lfuth a fusqone du Bethdino Emwothoyo da Zedqe Noşoye.    

Bu fusqonano’ste simo sturyo i şultonutho d’Erdoğan dmıdla a mqimdine u dayone du athro lu duyoqeyda u mawxaste a fusqone da bethdine kowın ğalabe naqlat siyasi ulo kine. Bi sbuthathe u mede dıkgorış u zuhoro, dbu zabnano dımqarawlın kampanyat da guboye d’Turkiya, mşarele dcowıd mqabıl di şultonutho.