Lebnon: mtayıb adyawma knuşyo du mawtbo celoyo du sutoro u driş ebe i aykanoyutho di mşaynutho, dilonoyith u zayno da galwoye Fleştoye uwi sbutho du zawco d’Hamas b’Lebnon

BCABDA, Lebnon — U mawtbo celoyo du sutoro layım adyawma bu qusro dı Bcabda bi rişonutho d’Josef Coun dkıtyo u knuşyo qamoyo dıksamle camu mawtbo mu zabno dmıdle i wolithayde xıd rişqutno d’Lebnon. Mbayn da sebwotho dıdrişi bu knuşyano kito i aykanoyutho du taymno d’Lebnon, u qyomo di şalyuthzayno cam İsroyel, a’thume madınhoye dcam Suriya wu zayno lo ruşmoyo dilonoyith u zayno da Fleştoye wi aykanoyutho da maşıryothaththe b’gawıd d’Lebnon. 

Bu tarano, u froshezwo d’Alcarabiya mawdacle lfuth mabuce ruşmoye, du zayno Fleştoyo b’gawıd da maşıryotho i sbutho asasi wa dıdrişo bu knuşyano, dilonoyith cal du rişqutno Coun wi şultonutho d’Nawwaf Salam zıd m’naqla makadwolın dıklozım u zayno dhowe balhude masro cami şultonutho d’Lebnon. 

Lfuth Alcarabiye, a’fusqone du mawtbo celoyo du sutoro d’Lebnon dkıtne ğnize, gıdmimodi zıd asas ba droşe dgıdhowelın a’rişone rabe d’Lebnon camu rişono dı Fleşt Mahmud Cabbas dıkmıntır dsoyım 21 bu yarhano socurutho ruşmoyto lu athro d’Lebnon. 

Camgabıd di aykanoyutho du zayno Fleştoyo b’gawıd da maşıryotho dıklozım dmitaslım li şultonutho d’Lebnon, u froshezwo d’Alcarabiya mawdacle ste du mawtbo celoyo du sutoro gıdtolıb mu zawco marıhbono d’Hamas dmaslım l’Lebnon a’farsufe dıkmıthomi dmafırwolın soruhe mu taymno d’Lebnon cala fenyotho d’Allımtalle u Kiryat Şmune bu garbiyo d’İsroyel bu yarho d’Nison dşaficina. 

Lfuth şutose ruşmoye, kito bua thro d’Lebnon 12 maşıryotho da Fleştoye dkıtne mbarbıze bı menyono d’hiğmınwotho, u acmaye ste kito 57 kunoşe da galwoye Fleştoye. A’maşıryothani wa kunoşani ksaymi ucdo baytoyutho l’hedor d’235 alfo galwoye Fleştoye.