Madcır tlotho bote la mşihoye dıkbişiwo b’Boğdod

Tlotho bote hathe dıkbişiwo b’Boğdod me hın farsufe dıkmısnodi me hayle folitiqoye u folhoye bi şultonutho du Iraq, madcıri ucdo la morathe dkıtne mu camaydan uma Sabiaa Mandoye.

Lfuth i sictho dımşatsowole Muqtada Alsadır, madcır holucdo hol 85 bote kbişe lu camaydan ula Mandoye bu Iraq.

İ sictho dımşatsowole u rişono du gabo Maşılmono Şica d’Altayyar Alsadri du Iraq Muqtada Alsadır, udhuwo ela i wolitho du tedciro da mulkone kbişe da qalilwotho Iraqoye, maglela ucdo lu tboco froso cala fulhone haroye dhawila b sbuthathe.

U hadomo di sictho (H)akem Alzamili bu buyono dıfrısle athmıl lu tboco froso, mawdacle dmadcır ucdo tlotho bote hathe la moraththe bi erişkoyto d’Boğdod dkıtne barmothoye mu camaydan uma Sabiaa Mandoye.

Alzamili bu buyonayde mırle “bu snodo dımqadım baroyo mu grub d’Saraya Alsalam, ubi mıştawtfonutho du rişono du grub qamoyo du gayso du Iraq, athmıl madcır tlotho bote kbişe la moraththe bı Boğdod bıthır mi şkuwe dımqadmowolın li sictho. Mbayn da 140 bote kbişe dımqadım şkuwe bhaq dıththe li sictho, madcır hul ucdo 85 bote la morathe”.

Bebzabno, Alzamil mawdcale da bote da farsufe dıkbişi bi hiğmonutho d’Boğdod, mahıtwo ido aclaye b’şıkıl lo qonunoyo mhın farsufe dkımmaşın fulhone du fasad, u makadle ste i ulsoyutho dmisım u sutoro da zedqe du camaydan u da Sabiaa Mandoye du Iraq, u dmıflıh laşan dmitadcıri a’mulkone kbişe la moraththe.

Meqım matheste, i qadişutho du papa Mor Fransis Qadmoyo bi socurutho dsımwole lu Iraq, kaliwo cali sbutho du tedciro da mulkone kbişe du camaydan, bnişo dmişaçıc lu dcoro lu athro.