Mahrıwo i qoyumtho du qtolğenso da Armınoye b’Shushi

Ba surotho dfrısla dafo Rusoyto mi hawa, kımahwe aydarbo mahrıwo i qoyumtho du qtolğenso dan Armınoye bi mdito d’Şuşe b’Nagorno Qarabax.

Bıthır mu qrobo beyn Armenia u Azerbaijan, mafitowa i mditathe lu duyoqo da hayle d’Azerbaijan.

Mahrıwo i qoyumtho da dıbhe du qtolğenso dsımwola i mamlaxtho da Cuthmanoye ban 1915 calan Armınoye. İ qoyumthathe’ste bi mdito d’Şuşe b’Nagorno Qarabax’yo, elo bıthır mıd hthımwo u qrobo beyn da hayle Armınoye uda hayle d’Azerbaijan-d’snidiwo ma marhıbone noqufe d’Turkiya, mafitowa i mditathe lu duyoqo d’Azerbaijan.

A surotho du tehriwo di qoyumthathe, frisi bi dafo Rusoyto-Mediaport u kımahwın, i duktho xlitho dkıtwa meqım i qoyumthathe rakıwto acla. Sim hani 4 hçome cala dukotho tawdithoye u marduthoye dan Armınoye b’Qarabax, bıthır mıd şaficiwo lu duyoqo d’Azerbaijan.

Bazabne haroyani, mahrıw mınyono d’citotho dan Armınoye b’Azerbaijan. Bu şuroyo du yarho dşafıcina, bu zabno dsımwole u rişqutno d’Azerbaijan socurutho lhdo ma citotho d’Hadrut, huwole amro dmitaqimi u dmitahrıwi a bınyone tawdithoye u marduthoye kulle dan Armınoye.

A mşale Armınoye da mdinotho dkbişi mırlın; Britho klozım dmaklıyo Azerbaijan, mu tehrwio da dukothaydan a marduthoye. Azerbaijan lıkfuhmo u timo da dukothani, cal dhınne latte hawxa athare time d’ruhaye. İ qoyumthathe mahtowa meqım 12 eşne qariwo l’cito-dhçımwo acla ba soruhe ma hayle d’Azerbaijan.