Mahwe hfuxyo mqabıl du sxoro du gabo d’HDP

U grub di HDP bu parlamento d’Turkiya, sımle taklitho u rfıdle dnofıq mu parlamento xıd protesto mqabıl du fusqono mid, dmitaqimo i hasinutho du qoyumo Ömer Faruk Gergerlioğlu.

 Bu zabno da rişone zawgoye di HDP krıhlın u plan du sxoro du gabathe, u Huyodo d’Urifi, u Tukoso Emwothoyo da Zedqe Noşoye u ğer gabe frişe mzaharlın Ankara u mırlın; usxoro d’HDP, dharbo mqabıl di demoqratoyutho d’Turkiyayo.

U qoyumo du gabo Demoqratoyo da Came Ömer Faruk Gergerlioğlu, mido athmıl i hasinuthayde mu parlamento d’Turkiya elo u qoyumo, rfıdle dnofıq mu bınyono du parlamento leşan dlo mımsık lu hbuşyo. Xıd hfuxyo mqabıl du fusqonano, u Grob d’HDP dkıtyo bu parlamento’ste sımle taklitho u fayış bıgawe du parlamento. Camgabe di HDP, ğer gabe di saqıbloyutho u tukose da zedqe noşoye b’Turkiya’ste mahwelın hfuxyo lu fusqonano dmid.

İ rişonutho zawgoyto di HDP huwla maqırhonutho calu planano dkıtle u gabo d’Erdoğan, dıksoyım kull mede dkothe bide leşan u sxoro du gabo d’HDP-dkıtyo u gabo 3’yo rabo b’Turkiya. İ rişonutho di HDP mırla; AKP kmıstacmıl u sistem di kinutho leşan u yuthronayde udi siyasayde.Pervin Buldan mawdacla, du mqımdino lo belhude kobıc d’soxır u gabaydan, elo bebzabno kobıc dmqım 687 hadome d’HDP ma haye folitiqoye.

Beyn da farusfaniste kito u qoyumo du camaydan Tuma Çelik, a rişone zawgoye catiqe Selahattin Demirtaş u Figen Yüksekdağ. Wu sxorano d’HDP-dharbo qşitho li demoqratoyutho b’Turkiya’yo. Calu qedomano d’Ankara l’HDP’ste, Nacho Sanchez Amor dkıtyo u mtaybono du taşroro dıkforıs u Huyodo d’Urifi cal Turkiya wu mşalo du komisyon d’Urifi cal Turkiya Sergey Lagondinsky mahwelın hfuxyo u mırlın; Turkiya mın reaksyon kubco me Urifi? Reaksyon msimono? Hathe i harayto du pluralism b’Turkiya’yo. U qedomano d’Turkiya, lıktore tuxlono bi demoqratoyutho du athro.

Bebzabno u Tukoso Emwothoyo da Zedqe Noşoye-HRW sımle qroyto l’Ankara dlo mawfıq Gergerlioğlu mu parlamento. U hkomano du qoyumo, dyoşo da zedqayde di hirutho du maftahfemo’yo. Hol 200 tukose da zedqe noşoye u farsufe hfite mşadarwolın meqım yarho l’Erdoğan u mawdacwolın u snodathe l’Gergerlioğlu-dıkmıthım me Ankara bi asirutho di marhıbonutho.