Malke Dağ mhase mi celtho du kewo di Corona

29 bu yarho d’Nisın bı tebo mahişono dıha ma sanode u mcawnone du ağuno umthonoyo nqil ma hayani mu kewo di Corona.

Malke Dağ dı mawladwo bi qritho d’Curnıs me abohe Gallo u Xazme Dağ bi şato da 1945 adyoma mcamasle caynothe li brithathe.

U mnoho dmidacwo bi makixutheyde u bu lebo şafyo dkıtwole trewole ışmo tawo bi fnitho d’Norsborg bayn du cameydan u Suryoyo u be bzabno mu zabno dı şamıcwo bu fulhono dkıtyo bi rişonutho du mawtbo umthoyo d’Bethnahrin hiye wi bathzawgeyde Paro Dağ lo maklelın rağlaye mu tacbo dobın qımu camathe.

U mnoho Malke mawladwo bi qritho d’Curnıs me abohe Gallo u Xazme Dağ bi şato da 1945 u bi şato da 1963 mhayadwole a hayeyde cam Paro Dağ mi iqartho d’Be Kıççe u bi şato da 1971 mgalwewolın lu athro d’Almanya u bi şato da 1976 athın u lu Swed u markwolın a hayathe bi fnitho d’Norsborg du Swed.

Mu zuwağano hawiwolın 3 abne u tarte bnotho dmalhaqwolın dhowelın 12 nubğe.

İ iqartho du mnoho u dilonoyith cami bathzawgeyde kulnaqqa a sanode d’Suroyo TVdı hışwiwole falqo mi iqarthathe u mawxa u mnoho du hawro Malke qulnaqa mcadarwo ba fulhone dkıpwole soyım u ba hfitwotho mıştawtafwo inaqa dkıtwe bu Swed.

Mawxa anhaste kımmina zel başlomo lu hawro da hawroneydan, wu farsufo du lebo şafyo u makixo, u lo yawmo lo kalıt mu fulhono umthonoyo du cameydux.