Masrıh ba casrowat d’Şamoşe u şamışyotho bu Swed u b’Hollanda

Bi cito d’Yoldath Aloho d’Tensta d’Stockholm du Swed bi rişonutho d’Mor Diyosqoros Benyamen Ataş, u efterufo fatıryarxoyo di marcitho du Swed, masrıh ba casrowat da Şamoşe u şamışyotho lı darğe frişe d’zamore u qoruye.

I fsihutho rabthowa bayn da hadome di cito d’Yoladath Aloho Meryem d’Tensta dkıtyo bi rişonutho du kohno Nacmatllah Dabag bu zabno du hasyo malwaşle a horure da şamoşe u şamışyotho dı xıdmi cito. Bu mamlo dsımle i mcalyutho d’mor Benyamen Ataş mqadamle tawdiyotho la babone u emhotho u lu kohno di cito dımhadarle a şamoşe u şamışyotho dı xıdmi cito qadışto. U be bzabno hadırwo qaşişo Yahkub dkıtwe meqımu kohno di cito wu hasyo mqadamle tawdiyotho lu mawtbo di cito calu tacbo dkoıb bi cito d’Mşiho.

Me gabo hreno i mcalyutho d’Mor Poliqarpus Awgin Aydin, u efetrufo fatıryarxoyo di marcitho d’Hollanda, mrayşanwole u qurobo alohoyo bi cito d’Yoldath Aloho bi mdito d’Hengelo b’Hollanda dkıtyo bi rişonutho du kohno claymo Yuhanın Barsaliba.

Bu qurobano u alohoyo i mcalyutho d’Mor Poliqarbus masrahle şamoşe u şamışyotho lı darğe frişe dımqadmi temeşto bi cito d’Yoldath Aloho. Bu zabno di mcalyutheyde malwaşwole a horure la şamoşe u şamışyotho a abohothe wu ahlathe mahwewolın i fsihuthathe ba hulhule dsımwolın. Bıthır mu qurobo alohoyo i mcalyutho du hasyo sımle mamlo cali ulsoyutho da şamoşe u şamışyotho dı saydi bicito u mqadamle tawdiyotho la abohothe lu kohno di cito u lu mawtbo dı qadiri sındi i claymuthathe dmotın la darğe frişe di şamoşutho.