Surto: Rudaw
05/04/2022

Maxle 12 qiryawotho hrene b’Zaxo

Bi netiçe da hçome qaşye dıksaymolın Turkiya calu garbiyo du Ciraq, maxlın 12 qıryawotho bi hiğmonutho d’Zaxo ma comuraththe, u mnnic ste u mzalo mathyo ebaye. A’hçomani dıksaymolın Turkiya bi dacwa du nfoqo mqabıl di PKK, kowın qento rabo cala haye da mdinoye, ukobın ste husrone momunoye rabe la qıryawotho.

05/04/2022

U qaymaqam di fnitho d’Bativa dkıtyo masırto cami mdabronutho d’Zaxo Ferhad Mahmud, mawdacle dmaxlelın 12 qıryawotho di fnitho ma comuraththe u mnıclınste u mazlo mathyo ebaye, mi celtho da hçome dıkmisomi ma tayisyotho du gayso Turkoyo calu garbiyo du Ciraq.

U qaymaqam d’Bativa dmawdacle dıklozım dmibayın tahrazto laşan dmırşomni a’thume di fnithayde cam Turkiya mırle ste “a’comure da qıryawotho kıbci dızzın ud’othın b’gawıd da fenyothaththe. Elo laşan dmınfıq moro li mşaynuthaththe ulaşan dlımıxlıq qetre b’gawıd di fnitho, mnıclan dhowe mazlo u mathyo bhın qıryawotho dıknıfli cala thume dı Turkiya”. U qaymaqam Mahmud bi maqırhonutho dhule li şabake d’Rudaw mathkarle ste dhınne xıd mşale lıkıbci dhowın a’barmothoyaththe debhe da taxtuşe dkowın bayn du gayso dı Turkiya wa mharbone di PKK.

Fares Sleman dkıtyo ha ma comure da qıryawothani dıkmıhçım aclaye m’Turkiya, mawdacle l’Rudaw, du gayso Turkoyo mahıtle ido cali fnitho d’Bativa u tlıble menaye dlıcıbri la qıryawothaththe.

Cali Seyawiş ste dkıtyo comuro bıhdo ma qıryawotho d’Bativa mırle l’Rudaw “mnic u mazlo mathyo ba qıryawotho d’Monini, Bankay Sarwo, Avle u Bandore ubı menyono hreno d’qıryawotho. A’Turkoye kmıncilan mu cboro la qıryothaydan cal da hçome kımdawmi cali fnitho”.

A’nacime di fnitho d’Bativa kmahwe du dactidaththe catumoyo, cal dıkrığşi b’zuctho rabtho ma hçome dıksaymolın Turkiya cala qıryawothaththe, ubi netiçe du medano kmıhromi mu yulfono.

İ qritho d’Bariva bu garbiyo du Ciraq dıkmişaklo m’74 qıryawotho, maxle hul ucdo 25 qıryawotho menaye mi celtho du dewam da hçome barbroye dıksaymolın Turkiya calu garbiyo du Ciraq bi dacwa du nfoqo mqabıl di PKK. Wu farsufo dıkşofıc mi fnithathe kibe bıfşitutho d’hoze i kmoyutho rabtho du husrono wa an’athre dıtrelın a’hçome dı Turkiya cala qıryawotho d’Bativa.