Mbayın zıd me 100 milyare dinare Iraqoye xıd tazminat la comure d’Ninwe

Mbayın zıd me 100 milyare dinare Iraqoye xıd tazminat la comure d’Ninwe dhzelın husrono ma qrobe uma cuqobe folhoye; beynothaye tazminat dgımitahwın lu camaydan di daşto d’Ninwe.

Mxasra hreto, i sictho dıkmaydo li ido a şkuwat du camaydan uda Sabiaa Mandoye dıkbişi a botathe, hiw fusqono dmitawrıxi a fulhonayda.

I sictho qamayto du ferco du tazminat dıkmitahwe la farsufe dhzelın husrono ba qrobe aw bi netiçe da fawde folhoye uda hçome marıhbone bi hiğmonutho d’Ninwe, mawdacla di şultonutho d’Boğdod mbayanla 106 milyare dinare li sictho, leşan dmitahwın la bnaymothoye d’Ninwe dhzelın a bote, a dukane, a radoyotho wa mulkonathe husrono.

U rişono di sictho dayono Mudhaffar Mahdi Saleh, mawdacle di buçathe, gıdmifarqo cal 12 uhol 15 alfo bnaymothoye dhzelın hsurone; beaynothaye comure di daşto d’Ninwe. Dayono Saleh mawdacle’ste di sicthayde kıtla belhude i wolitho dobo tazminat la comure d’Mawsal, di daşto d’Ninwe udu taymno d’Mawsal.

Bebzabno mathkarle dhulucdo hiw tazminat l’hedor d’70 alfo farsufe dhzelın husrono, beynothaye sohde, mçarhe, mvayce, wi sictho kımdawmo ucdo d’dorşo a talabe da bnaymothoye. Mxasra hreto, u rişono Şica Muqtada Alsadır, fsıqle athmıl dmitawrıxi a fulhone di sictho dımşatsowale, bnişo dmadcıro a bote wa mulkone du camaydan uda Sabiaa Mandoye dıkbişi me hın farsufe dıımdacın dkıtne masre bu gabayde.

Lfuth u buyono dfrısle u makıthbo d’Alsadır, a fulhone di sictho gıdmdawmi huli harayto du yarho d’İlul dıbqamuthayna. Bu buyono dfris, kmıtlıb man abne du camaydan uma Sabiaa Mandoye dımşadri li sictho, a şkuwatathe cama warqe ruşmoye, ışmonaye wa furşağnathe bu darbo di email di sictho udu raqmo dkıtla bu Watsup.