U rişwazire hatho di Libnan Nawaf Salam huwle şudoyo dsoyım reforme bu haqlo di kinutho, du momuno u dmarkıw i mşaynutho bu athro

Bıthır zıttır me tarte d’eşne b’kriz folitiqoyo, mşaklo bi harayto i şultonutho hathto d’Lebnon. U rişqutno Joseph Aoun dmawdacle dmıstaqbele i isticfa di şultonutho zabnoyto u maqbele i hathto du rişwazire Nawaf Salam dıkmişaklo me 24 wazire; beynothaye 5 neşe.Athmıl ruşmoyith mawdıc dımşaklo i şultonutho hathto d’Lebnon-dheş ma 2022 dlo şultonutho’yo mcal fothe da krize folitiqoye u momunoye du athro. Elo athmıl, mıstaqbele u rişqutno Joseph Aoun i isticfa di şultonutho zabnoyto d’Miqati u maqbele ruşmoyith i şultonutho hathto d’Nawaf Salam dıkmişaklo me 24 wazire-dkıtne fliğe b’şawyutho beyn da gabe Mşihoye u Maşılmone. Ucdo i wolitho di şultonutho hathto, d’dorşo u dımqadmo maqırhonutho qrıhto, cala fulhone ucalu strateji dkıtla leşan u dactith du athro. İ tahrazto di şultonutho klozım bıthır dşufco bu quwolo du parlamento du athro, leşan dmitafito la haye. U tebano fris, bıthır mi ytawto dhawile Aoun cami tahlufto du mathlono d’Amerika bu Madınho Mescoyo Morgan Ortagus dım’akadla, d’Amerika lo kubco Hizballah bi şultonuthathe. U rişwazire Salam huwle şudoyo dsoyım reforme bu haqlo di kinutho, du momuno u dmarkıw i mşaynutho bu athro u d’Beyrut gıdmtabqo u qonuno Emwothoyo dan 1701 d’hthımwole u qrobo catiqo beyn Hizballah u İsroyel ba 2006. Wu grışle u zuhoro du zawcano uğer ğrobe, klozım dmıgroşi mu taymno du nahro d’Litani dkıtyo cala thume d’İsroyel. Lfuth u mede dıkmahwe, i şultonutho d’Salam kımarhıqo ruha me Hizballah, cal d’Beyrut sniqoyto’yo l’snodo momunoyo me larwal leşan u hethotho du athro udu momunayda dkıtyo b’kriz heş ma 2019. Salam kıtle’ste sabro, dmişawşıti a esore cami Scudiye ucam ğer athrawotho du Xaliç. Hizballah lo snıdwole Salam li wolithathe, elo naqla hreto mıdwole duktho ba droşe dcalu neqoyo d’rişwazire hatho. Salam u Aoun kıtle cayni renyo’ste, da zayne kulle klozım dfayti l’ide du gayso du athro. Cali şultonutho hathto dımşaklo b’Lebnon, i rişizgadutho d’Amerika b’Beyrut wi mşalonitho d’Emwotho Mhaydotho b’Lebnon Plassxart mhanelın i şultonuthathe u tlıbala kuşore bu terkiwo da reforme, ubu bnoyo u hethotho da şutose frişe du athro. Beyn dan 24 wazire hathe kito 5 neşe u hın menaye’ste hanine; U tahlufo du rişwazire Tarek Mıtri Waziro du sutoro Michel Menassah Waziro di baroyutho udi galwoyutho Youssef Rajji U waziro di gawoyutho Ahmed al Hajjar U waziro du momuno Yassin Jaber-dkıtyo Şica folitiqoro şaryo, elo qariwo lu zawco d’Amal d’Nebih Berri.